室溫超導體 ‘突破’ 受質疑
Sek-un chhiau-tō-thé ‘tu̍t-phòa’ siū chit-gî
By Karmela Padavic-Callaghan, 2023-7-26, New Scientist
創造 tī 室溫和一般壓力下 ê 超導材料是大代誌, 毋過一个宣布 in 做到 ê 研究團隊, 得著 ê 質疑較濟過樂觀看待.
Chhòng-chō tī sek-un hām it-poaⁿ ap-le̍k hā ê chhiau-tō châi-liāu sī tōa tāi-chì, m̄-koh chi̍t-ê soan-pò͘ in chò-kàu ê gián-kiù thoân-tūi, tit-tio̍h ê chit-gî khah chē kòe lo̍k-koan khòaⁿ-thāi.
一个研究團隊宣布, 已經創造出一種 tī 室溫 kap 環境壓力下, 會得導電 ê 材料, 毋過濟濟物理學家對這保持高度懷疑. Hyun-Tak Kim, Virginia ê William & Mary 學院, 對 New Scientist 講, 伊將支持任何試欲複製 in 團隊工作 ê 人.
Chi̍t-ê gián-kiù thoân-tūi soan-pò͘, í-keng chhòng-chō chhut chi̍t-chióng tī sek-un kap khoân-kéng ap-le̍k hā, ē-tit tō-tiān ê châi-liāu, m̄-koh chē-chē bu̍t-lí ha̍k-ka tùi che pó-chhî ko-tō͘ hoâi-gî. Hyun-Tak Kim, Virginia ê William & Mary Ha̍k-īⁿ, tùi New Scientist kóng, i chiong chi-chhî jīm-hô chhì boeh ho̍k-chè in thoân-tūi kang-chok ê lâng.
超導體是一種材料, 電流流過袂有阻力, 所以會得大大降低電子產品 ê 能源成本. 但是, 百外年來, 研究人員一直做袂到, 除非是 tī 極端條件下, cc* 極低溫 kap 極懸壓力. [* cc = chhin-chhiūⁿ]
Chhiau-tō-thé sī chi̍t-chióng châi-liāu, tiān-liû lâu-kòe bē ū chó͘-le̍k, só͘-í ē-tit tōa-tōa kàng-kē tiān-chú sán-phín ê lêng-goân sêng-pún. Tān-sī, pah-gōa nî lâi, gián-kiù jîn-oân it-ti̍t chò bē-kàu, tî-hui sī tī ke̍k-toan tiâu-kiāⁿ hā, cc* ke̍k kē-un kap ke̍k koân ap-le̍k. [* cc = chhin-chhiūⁿ]
今, Kim 和同事宣布, 已經製出室溫 kap 一般壓力下 ê 超導材料.
Taⁿ, Kim hām tông-sū soan-pò͘, í-keng chè chhut sek-un kap it-poaⁿ ap-le̍k hā ê chhiau-tō châi-liāu.
如果 in ê 講法會堪得科學 tek 檢驗, 這个成就 tō 是真正了不起, 所致, 研究團隊提供證明 ê 負擔 mā 是無地講. 事實上, 早前一寡有關超導突破 ê 報告, 後來受撤消, 因為其他團隊無法度複製 chiah-ê 結果. 這大大顯示代誌無 hiah 簡單.
Jû-kó in ê kóng-hoat ē kham-tit kho-ha̍k-tek kiám-gīam, chit-ê sêng-chiū tō sī chin-chiàⁿ liáu-put-khí, só͘-tì, gián-kiù thoân-tūi thê-kiong chèng-bêng ê hū-tam mā sī bô-tè kóng. Sū-si̍t-siōng, chá-chêng chi̍t-kóa iú-koan chhiau-tō tu̍t-phòa ê pò-kò, āu-lâi siū thiat-siau, in-ūi kî-thaⁿ thoân-tūi bô hoat-tō͘ ho̍k-chè chiah-ê kiat-kó. Che tōa-tōa hián-sī tāi-chì bô hiah kán-tan.
.jpeg)
.png)
