佗一个時間離半暝上近? 囡仔數學問題引困擾
Tó chi̍t-ê sî-kan lī pòaⁿ-mê siōng kīn? Gín-á sò͘-ha̍k būn-tê ín khùn-jiáu
Keval Singh, 2023-6-30, The Strait
表面看, 這是 kài 簡單 ê 問題 [看圖]. M̄-koh, 貼 tī 社交媒體 ê 一个有關時間 ê 囡仔數學問題引起熱傳, 予人 tī 不止一个看是有效 ê 答案中間躊躇袂定, 點讀數已經有 140 萬.
Piáu-bīn khòaⁿ, che sī kài kán-tan ê būn-tê [khòaⁿ tô͘]. M̄-koh, tah tī siā-kau mûi-thé ê chi̍t-ê iú-koan sî-kan ê gín-á sò͘-ha̍k būn-tê ín-khí jia̍t-thoân, hō͘ lâng tī put-chí chi̍t-ê khòaⁿ sī ū-hāu ê tap-àn tiong-kan tiû-tû bē-tiāⁿ, tiám-tha̍k sò͘ í-keng ū 140 bān.
社媒用者看是予這个問題困擾著, koh 提出無仝 ê 答案.
Siā-mûi iōng-chiá khòaⁿ sī hō͘ chit-ê būn-tê khùn-jiáu tio̍h, koh thê-chhut bô-kāng ê tap-àn.
濟濟人想講答案是 D, 因為彼是半暝 koh 過 3 分鐘.
Chē-chē lâng siūⁿ-kóng tap-àn sī D, in-ūi he sī pòaⁿ-mê koh kòe 3 hun-cheng.
M̄-koh, 有人反駁講, 12:03am 上倚半暝, 但是彼是 tī 半暝後, 毋是到半暝, 因為時間行向前.
M̄-koh, ū-lâng hoán-pok kóng, 12:03am siōng óa pòaⁿ-mê, tān-sī he sī tī pòaⁿ-mê āu, m̄-sī kàu pòaⁿ-mê, in-ūi sî-kan kiâⁿ hiòng chêng.
照這个理路, 答案應該是 A, in án-ne 講, 11:55am 離半暝猶有 12 點鐘 koh 5 分. 12:03am 著 koh 23 點鐘 koh 57 分才會到半暝, 所擺這是上遠.
Chiàu chit-ê lí-lō͘, tap-àn eng-kai sī A, in án-ne kóng, 11:55am lī pòaⁿ-mê iáu-ū 12 tiám-cheng koh 5 hun. 12:03am tio̍h koh 23 tiám-cheng koh 57 hun chiah ē kàu pòaⁿ-mê, só͘-pái che sī siōng hn̄g.
濟濟 Twitter 用者無同意, 論講, 這个問題是有關距離遠近, 毋是時間前後.
Chē-chē Twitter iōng-chiá bô tông-ì, lūn kóng, chit-ê būn-tê sī iú-koan kī-lī hn̄g-kīn, m̄-sī sî-kan chêng-āu.
一寡受訪者講, 這个問題會困擾, 是因為話句無清楚, 無指明是 "佗一个半暝."
Chi̍t-kóa siū-hóng-chiá kóng, chit-ê būn-tê ē khùn-jiáu, sī in-ūi ōe-kù bô chheng-chhó, bô chí-bêng sī "tó chi̍t-ê pòaⁿ-mê."
其中有一个, 答案 kài 簡單: 問人工智慧 chatbot* ChatGPT, 彼講, D 是正確答案. [* chatbot /chhat.pot/ = 開講機器人]
Kî-tiong ū chi̍t-ê, tap-àn kài kán-tan: Mn̄g jîn-kang tì-hūi chatbot* ChatGPT, he kóng, D sī chèng-khak tap-àn. [* chatbot /chhat.pot/ = khai-káng ke-khì-lâng]
No comments:
Post a Comment