AI model Satsuki Ai

2023-5-30 - (Tokyo) AI 波浪已經引起世界 te̍k ê 風颱, 科技公司捒出種種 AI 相關 ê program 和 app. 趁燒, 日本出版社 Shoeisha ê "Weekly Playboy" (𨑨迌仔周刊) 雜誌 mā 推出一个 AI model, 號做 Satsuki Ai, 出場 tī 一个電子相簿. 干焦一暝, 她 ê fans 已經 chhèng 到 5,000 較加.

--

2023-5-30 - (Tokyo) AI pho-lōng í-keng ín-khí sè-kài te̍k ê hong-thai, kho-ki kong-si sak-chhut chióng-chióng AI siong-koan ê program hām app. Thàn-sio, Ji̍t-pún chhut-pán-siā Shoeisha ê "Weekly Playboy" (Thit-thô-á Chiu-khan) cha̍p-chì mā thui-chhut chi̍t-ê AI model, hō chò Satsuki Ai, chhut-tiûⁿ tī chi̍t-ê tiān-chú siòng-phō͘. Kan-ta chi̍t-mê, yi ê fans í-keng chhèng kàu 5,000 khah-ke.

--

30th May 2023 – (Tokyo) The AI wave has taken the world by storm, with tech companies launching various AI-related programs and applications. In response, Japanese publisher Shueisha’s “Weekly Playboy” magazine has introduced an AI model named Satsuki Ai, who is featured in an electronic photo album. In just one night, the number of her fans skyrocketed to over 5,000.

--

https://www.dimsumdaily.hk/japanese-magazine-weekly.../

用走 ê, 毋通用行 ê

用走 ê, 毋通用行 ê. 記予好, 毋管你是走欲揣食 ê, a̍h 是走欲莫 hông 食去. 有時陣, 你 mā 講袂來是佗一項. 毋管佗一項, 走 tō 著. -- 黃仁勳 (Jensen Huang)

--

Iōng cháu ê, m̄-thang iōng kiâⁿ ê. Kì hō͘ hó, m̄-koán lí sī cháu boeh chhōe chia̍h-ê, a̍h sī cháu boeh mài hông chia̍h--khì. Ū sî-chūn, lí mā kóng bē-lâi sī tó chi̍t-hāng. M̄-koán tó chi̍t-hāng, cháu tō-tio̍h. -- 黃仁勳 (Jensen Huang)

--

Run, don’t walk. Remember, either you’re running for food, or you are running from becoming food. And oftentimes, you can’t tell which. Either way, run. -- Jensen Huang

--

Tāu-gê | 豆芽

Tāu-gê | 豆芽

Che sī góa jogging /jiok.kin/ (逐跟?) ê sî iōng lâi thiaⁿ im-ga̍k a̍h thiaⁿ ián-káng ê hīⁿ-ki. I pau-hâm chi̍t-ê chhiong-tiān a̍p-á hām chi̍t-tùi bô-sòaⁿ ê ‘tāu-gê'. Tāu-gê sī góa kā hō ê, i ê Eng-bûn sī kiò chò earbuds a̍h earpods. M̄-chai lí kah-ì chit-ê miâ a̍h bô? A̍h-sī kā kiò chò siáⁿ khah hó?

--

這是我 jogging /jiok.kin/ (逐跟?) ê 時用來聽音樂 a̍h 聽演講 ê 耳機. 伊包含一个充電盒仔和一對無線 ê '豆芽'. 豆芽是我 kā 號 ê, 伊 ê 英文是叫做 earbuds a̍h earpods. 毋知你佮意這个名 a̍h 無? A̍h 是 kā 叫做啥較好?

--

時鐘 | Sî-cheng

時鐘

倒手爿是舊時鐘. 實在講, mā 無 kài 舊, 極加是兩年前才買 ê. 拄開始, 伊行了小可比標準時間較緊一屑仔. 後來, 伊慢慢正常. 閣來, 伊 tō lú 來 lú 貧惰, lú 行 lú 慢 ah. 兩工前, 伊開始行一下, 停一下, kā 換電池 mā 無較縒. 落尾, 伊規氣擋恬, 死 tī hia, 袂振袂動 ah. 我無伊 ê 法 ah-lah!

今仔日, 我去 Poya 家庭五金行欲買新 ê 時鐘. 我問店員講: "小姐, sî-cheng tī 佗位?"

店員𤆬我去看 '洗衣精' ê 貨架, 原來她 kā '時鐘' 聽做 /sì.i.cheng/ (洗衣精). 佳哉, 我 kō͘ 手比時錶仔, 她 tō 知影我是 teh 講啥.

落尾, 我買著這个新時鐘, 新台票 99 箍, tō 是正手爿彼个. 希望伊會當長歲壽, 上無著活 2 年 oh!

--

Sî-cheng

Tò-chhiú pêng sī kū sî-cheng. Si̍t-chāi kóng, mā bô kài kū, ke̍k-ke sī nn̄g-nî chêng chiah bé ê. Tú khai-sí, i kiâⁿ liáu sió-khóa pí piau-chún sî-kan khah kín chi̍t-sut-á. Āu-lâi, i bān-bān chèng-siông. Koh-lâi, i tō lú lâi lú pîn-tōaⁿ, lú kiâⁿ lú bān ah. Nn̄g-kang chêng, i khai-sí kiâⁿ chi̍t-ē, thêng chi̍t-ē, kā ōaⁿ tiān-tî mā bô khah-choa̍h. Lo̍h-bóe, i kui-khì tòng-tiām, sí tī hia, bē-tín bē-tāng ah. Góa bô i ê hoat ah-lah!

Kin-á-ji̍t, góa khì Poya Ka-têng Ngó͘-kim Hâng boeh bé sin ê sî-cheng. Góa mn̄g tiàm-oân kóng: "Sió-chiá, sî-cheng tī tó-ūi?"

Tiàm-oân chhōa góa khì khòaⁿ 'sé-i-cheng' ê hòe-kè, goân-lâi yi kā 'sî-cheng' thiaⁿ chò /sì.i.cheng/ (洗衣精). Ka-chài, góa kō͘ chhiú pí sî-pió-á, yi tō chai-iáⁿ góa sī teh kóng siáⁿ.

Lo̍h-bóe, góa bé tio̍h chit-ê sin sî-cheng, sin Tâi-phiò 99 kho͘, tō sī chiàⁿ-chhiú pêng hit-ê. Hi-bāng i ē-tàng tn̂g hòe-siū, siōng-bô tio̍h oa̍h 2 nî oh!

--