時鐘
倒手爿是舊時鐘. 實在講, mā 無 kài 舊, 極加是兩年前才買 ê. 拄開始, 伊行了小可比標準時間較緊一屑仔. 後來, 伊慢慢正常. 閣來, 伊 tō lú 來 lú 貧惰, lú 行 lú 慢 ah. 兩工前, 伊開始行一下, 停一下, kā 換電池 mā 無較縒. 落尾, 伊規氣擋恬, 死 tī hia, 袂振袂動 ah. 我無伊 ê 法 ah-lah!
今仔日, 我去 Poya 家庭五金行欲買新 ê 時鐘. 我問店員講: "小姐, sî-cheng tī 佗位?"
店員𤆬我去看 '洗衣精' ê 貨架, 原來她 kā '時鐘' 聽做 /sì.i.cheng/ (洗衣精). 佳哉, 我 kō͘ 手比時錶仔, 她 tō 知影我是 teh 講啥.
落尾, 我買著這个新時鐘, 新台票 99 箍, tō 是正手爿彼个. 希望伊會當長歲壽, 上無著活 2 年 oh!
--
Sî-cheng
Tò-chhiú pêng sī kū sî-cheng. Si̍t-chāi kóng, mā bô kài kū, ke̍k-ke sī nn̄g-nî chêng chiah bé ê. Tú khai-sí, i kiâⁿ liáu sió-khóa pí piau-chún sî-kan khah kín chi̍t-sut-á. Āu-lâi, i bān-bān chèng-siông. Koh-lâi, i tō lú lâi lú pîn-tōaⁿ, lú kiâⁿ lú bān ah. Nn̄g-kang chêng, i khai-sí kiâⁿ chi̍t-ē, thêng chi̍t-ē, kā ōaⁿ tiān-tî mā bô khah-choa̍h. Lo̍h-bóe, i kui-khì tòng-tiām, sí tī hia, bē-tín bē-tāng ah. Góa bô i ê hoat ah-lah!
Kin-á-ji̍t, góa khì Poya Ka-têng Ngó͘-kim Hâng boeh bé sin ê sî-cheng. Góa mn̄g tiàm-oân kóng: "Sió-chiá, sî-cheng tī tó-ūi?"
Tiàm-oân chhōa góa khì khòaⁿ 'sé-i-cheng' ê hòe-kè, goân-lâi yi kā 'sî-cheng' thiaⁿ chò /sì.i.cheng/ (洗衣精). Ka-chài, góa kō͘ chhiú pí sî-pió-á, yi tō chai-iáⁿ góa sī teh kóng siáⁿ.
Lo̍h-bóe, góa bé tio̍h chit-ê sin sî-cheng, sin Tâi-phiò 99 kho͘, tō sī chiàⁿ-chhiú pêng hit-ê. Hi-bāng i ē-tàng tn̂g hòe-siū, siōng-bô tio̍h oa̍h 2 nî oh!
No comments:
Post a Comment