遊隼相片得著鳥類攝影賞

遊隼相片得著鳥類攝影賞

Iû-chún siòng-phìⁿ tit-tio̍h chiáu-lūi liap-iáⁿ siúⁿ

2023-9-5, BBC in Pictures

攝影師 Jack Zhi 翕 ê 一隻遊隼 (peregrine falcon) 鳥母保護鳥仔囝 ê 精彩畫面, 得著今年 ê 年度鳥類攝影師賞.

Liap-iáⁿ-su Jack Zhi hip ê chi̍t-chiah iû-chún (peregrine falcon) chiáu-bó pó-hō͘ chiáu-á-kiáⁿ ê cheng-chhái ōe-bīn, tit-tio̍h kin-nî ê Nî-tō͘ Chiáu-lūi Liap-iáⁿ-su Siúⁿ.

這張相片翕 tī California, 拍敗超過 20,000 張 ê 參賽作品, 得著勝利.

Chit-tiuⁿ siòng-phìⁿ hip tī California, phah-pāi chhiau-kòe 20,000 tiuⁿ ê chham-sài chok-phín, tit-tio̍h sèng-lī.

"四年來, 我一直試欲掠著遊隼鳥母攻擊大布袋鵝 (brown pelican) 彼種罕見 ê 驚人速度 hām 猛掠動作," Zhi 講.

"Sì-nî lâi, góa it-ti̍t chhì boeh lia̍h-tio̍h iû-chún chiáu-bó kong-kek tōa pò͘-tē-gô (brown pelican) hit-chióng hán-kiàn ê kiaⁿ-lâng sok-tō͘ hām mé-lia̍h tōng-chok," Zhi kóng.

"我佮意這張相內面 he 布袋鵝 ê 眼神 -- 意外 koh 著驚. He 動作緊速, 一 ba̍k-nih tō 結束 ah. M̄-koh, 我永遠 to 會記得 hit 時刻."

"Góa kah-ì chit-tiuⁿ siòng lāi-bīn he pò͘-tē-gô ê gán-sîn -- ì-gōa koh tio̍h-kiaⁿ. He tōng-chok kín-sok, chi̍t ba̍k-nih tō kiat-sok ah. M̄-koh, góa éng-oán to ē-kì-tit hit sî-khek."

https://www.bbc.com/news/in-pictures-66706149?fbclid=IwAR0V8Sg_UwcklCfqab2bT-llD52MFa2H7ISfGORSFFtC_XooixJ-aMrnNYc

科學家開發出免透析 ê 人工腰子

科學家開發出免透析 ê 人工腰子

Kho-ha̍k-ka khai-hoat chhut bián thàu-sek ê jîn-kang io-chí

By Staff Writer, 2023-9-3, The Brighter Side of News

研究人員得欲突破, 將 ē-tàng 根本 teh 改變腰子病 ê 治療. 久來, 透析一直是千萬腰子病患者 ê 救世主, che 可能真緊 tō kan-ta 記 tī 醫學歷史.

Gián-kiù jîn-oân tit-boeh tu̍t-phòa, chiong ē-tàng kin-pún-teh kái-piàn io-chí-pēⁿ ê tī-liâu. Kú-lâi, thàu-sek it-ti̍t sī chhian-bān io-chí-pēⁿ hoān-chiá ê kiù-sè-chú, che khó-lêng chin-kín tō kan-ta kì tī i-ha̍k le̍k-sú.

美國 California San Francisco 大學 (UCSF) 一組認真 ê 科學家 kō͘ in 突破 tek 發明 tng-teh 推動這項革命: 人工腰子.

Bí-kok California San Francisco Tāi-ha̍k (UCSF) chi̍t-cho͘ jīn-chin ê kho-ha̍k-ka kō͘ in tu̍t-phòa-tek hoat-bêng tng-teh thui-tōng chit-hāng kek-bēng: jîn-kang io-chí.

想看覓, 若有一台機仔 ē-tàng 發揮腰子 ê 功能, koh 無需要大機器 a̍h 繁複 ê 徙種手術, án-ne 偌好. UCSF 團隊透過種入生物反應器來實現這个想法. He 機仔 m̄-nā 模仿人類腰子, koh ē-tàng 增加伊 ê 功能.

Siūⁿ khòaⁿ-māi, nā ū chi̍t-tâi ki-á ē-tàng hoat-hui io-chí ê kong-lêng, koh bô su-iàu tōa ke-khì a̍h hoân-ho̍k ê sóa-chèng chhiú-su̍t, án-ne gōa hó. UCSF thoân-tūi thàu-kòe chèng-ji̍p seng-bu̍t hoán-èng-khì lâi si̍t-hiān chit-ê siūⁿ-hoat. He ki-á m̄-nā bô͘-hóng jîn-lūi io-chí, koh ē-tàng cheng-ka i ê kong-lêng.

"基本 tek, che 生物反應器予縛 tī 透析機器 a̍h 無限期等徙種 ê 人帶來希望," 一个醫學界 ê 人 án-ne 講. 

"Ki-pún-tek, che seng-bu̍t hoán-èng-khì hō͘ pa̍k tī thàu-sek ke-khì a̍h bû-hān-kî tán sóa-chèng ê lâng tòa-lâi hi-bāng," chi̍t-ê i-ha̍k-kài ê lâng án-ne kóng. 

https://www.thebrighterside.news/post/scientists-develop-artificial-kidney-that-could-eliminate-the-need-for-dialysis

一間 Japan startup kō͘ 3D 印 價數 ná 車 ê 小住宅

一間 Japan startup kō͘ 3D 印 價數 ná 車 ê 小住宅

Chi̍t-keng Japan startup kō͘ 3D ìn kè-siàu ná chhia ê sió chū-the̍h

By Srishti Mitra, 2023-9-3, Yanko Design

近來項項 mi̍h ē-sái kō͘ 3D 印, 那毋印建築物? 濟濟建築公司採用 3D 印刷做建築結構 ê 優先技術. 3D 印 ê 建築慢慢 但定著 ē 普遍 koh 有氣勢.

Kīn-lâi hāng-hāng mi̍h ē-sái kō͘ 3D ìn, ná m̄ ìn kiàn-tio̍k-bu̍t? Chē-chē kiàn-tio̍k kong-si chhái-iōng 3D ìn-soat chò kiàn-tio̍k kiat-kò͘ ê iu-sian ki-su̍t. 3D ìn ê kiàn-tio̍k bān-bān tān tiāⁿ-tio̍h ē phó͘-phiàn koh ū khì-sè.

莫怪, 因為伊 ê 好處濟濟! He 是簡單, 高效, 創新 ê 技術, 降低出錯 ê 風險, mā 節省時間. 3D 印刷消除濟濟施工中 ê 繁複過程, 予伊大大簡化.

Bo̍k-koài, in-ūi i ê hó-chhù chē-chē! He sī kán-tan, ko-hāu, chhòng-sin ê ki-su̍t, kàng-kē chhut-chhò ê hong-hiám, mā chiat-séng sî-kan. 3D ìn-soat siau-tî chē-chē si-kang tiong ê hoân-ho̍k kòe-têng, hō͘ i tōa-tōa kán-hòa.

Japan 營建 ê startup Serendix, 舊年創造一款受歡迎 ê 小型概念設計, 符合 Japan ê 地動標準, hām Europa ê 隔熱標準. 最近, in koh 推出 "Fujitsbo" -- 價數 550 萬日票 (約 12 萬台票) ê 小型住宅!

Japan êng-kiàn ê startup Serendix, kū-nî chhòng-chō chi̍t-khoán siū hoan-gêng ê sió-hêng kài-liām siat-kè, hû-ha̍p Japan ê tē-tāng piau-chún, hām Europa ê keh-jia̍t piau-chún. Chòe-kīn, in koh thui-chhut "Fujitsbo" -- kè-siàu 550 bān Ji̍t-phiò (iok 12 bān Tâi-phiò) ê sió-hêng chū-the̍h!

叫 Fujitsubo (藤壷) ê 這種 siap-tia̍p 住宅, 佔地 kan-ta 50 平米 (15.12 坪), 較細真濟比起美國 ê 新厝, he 有 5 倍大.

Kiò Fujitsubo (藤壷) ê chit-chióng siap-tia̍p chū-the̍h, chiàm-tē kan-ta 50 pêⁿ-bí (15.12 phêng), khah sè chin chē pí khí Bí-kok ê sin-chhù, he ū 5-pōe tōa.

Che 3D 印 ê 住宅有一間睏房, 一間浴室, hām 一个連灶跤 ê 開放起居室... 價數 kan-ta cpt 一台車! 這種厝非常適合雙人 a̍h 獨身蹛.

Che 3D ìn ê chū-the̍h ū chi̍t-keng khùn-pâng, chi̍t-keng e̍k-sek, hām chi̍t-ê liân chàu-kha ê khai-hòng khí-ki-sek... kè-siàu kan-ta cpt chi̍t-tâi chhia! Chit-chióng chhù hui-siông sek-ha̍p siang-lâng a̍h to̍k-sin tòa.

https://www.yankodesign.com/2023/09/03/a-japanese-startup-is-3d-printing-small-homes-with-the-same-price-tag-as-a-car/

"Pakistan 愛欲 India 這个名" - 社媒 tng-teh 烘 ê 改名熱

"Pakistan 愛欲 India 這个名" - 社媒 tng-teh 烘 ê 改名熱

"Pakistan Ài-boeh India Chit-ê Miâ" - Siā-mûi tng-teh Hang ê Kái-miâ Jia̍t

Edited by Nikhil Pandey, 2023-9-6, NJITV

India 總統 Droupadi Murmu kō͘ "Bharat 總統" 名義邀請 G20 頭人參加暗宴造成 ê 熱議已經傳到國外.

India Chóng-lí Murdi kō͘ "Bharat Chóng-lí" miâ-gī iau-chhiáⁿ G20 thâu-lâng chham-ka àm-iàn chō-sêng ê jia̍t-gī í-keng thoân-kàu kok-gōa.

 

X (原 Twitter) 頂, 一个帖仔引用 Pakistan 當地媒體 ê 報導講, Pakistan 可能考慮欲採用 "India" 這个名.

X (goân Twitter) téng, chi̍t-ê thiap-á ín-iōng Pakistan tong-tē mûi-thé ê pò-tō kóng, Pakistan khó-lêng khó-lī boeh chhái-iōng "India" chit-ê miâ.

South Asia Index ê X 帖仔講, "India 若 tī UN 正式取消 ‘India’ 這个名, Pakistan 可能提出 tùi 這个名 ê 要求 -- 根據當地媒體. Pakistan 民族主義者長期以來一直認為, Pakistan 有權使用這个名, 因為 he 代表 tī Pakistan ê Indus 地區."

South Asia Index ê X thiap-á kóng, "India nā tī UN chèng-sek chhú-siau ‘India’ chit-ê miâ, Pakistan khó-lêng thê-chhut tùi chit-ê miâ ê iau-kiû -- kin-kì tong-tē mûi-thé. Pakistan bîn-cho̍k chú-gī-chiá tn̂g-kî í-lâi it-ti̍t jīn-ûi, Pakistan ū khoân sú-iōng chit-ê miâ, in-ūi he tāi-piáu tī Pakistan ê Indus tē-khu."

不而過, India 政府猶無任何意圖改變國名 ê 聲明.

Put-jî-kò, India chèng-hú iáu bô jīm-hô ì-tô͘ kái-piàn kok-miâ ê seng-bêng.

這个帖仔引起社媒 ê 熱烈反應, 濟濟人講, che 是笑詼. 其他人 mā 貼一寡趣味 ê 反應.

Chit-ê thiap-á ín-khí siā-mûi ê jia̍t-lia̍t hoán-èng, chē-chē lâng kóng, che sī chhiò-khoe. Kî-thaⁿ lâng mā tah chi̍t-kóa chhù-bī ê hoán-èng.

"Pakistan 若講 in 是 India, Afghanistan 可能講 in 是 Pakistan, Russia mā 可能講 in 是 Afghanistan, tt. Pakistan 絕對無應該引起這種牽涉規世界 ê 連鎖反應," 一个用戶 án-ne 評論.

"Pakistan nā kóng in sī India, Afghanistan khó-lêng kóng in sī Pakistan, Russia mā khó-lêng kóng in sī Afghanistan, tt. Pakistan choa̍t-tùi bô eng-kai ín-khí chit-chióng khan-sia̍p kui sè-kài ê liân-só hoán-èng," chi̍t-ê iōng-hō͘ án-ne phêng-lūn.

https://www.ndtv.com/india-news/pakistan-will-claim-india-social-media-post-goes-viral-amid-name-change-buzz-4364005

Julia Fox 穿銀鍊奶帕 hām 金屬 T 褲為 New York 時裝周起鼓

Julia Fox 穿銀鍊奶帕 hām 金屬 T 褲為 New York 時裝周起鼓

Julia Fox Chhēng Gîn-liān Leng-phè hām Kim-sio̍k T-khò͘ Ūi New York Sî-chong Chiu Khí-kó͘

By Curtis M. Wong, 2023-9-6, Huffpost

Kō͘ 系列出格造型 kā Franse Cannes 電影節 pìⁿ 做她 ê 展示台, Julia Fox 欲 tī 美國 koh 再 án-ne.

Kō͘ hē-lia̍t chhut-keh chō-hêng kā Franse Cannes Tiān-iáⁿ Cheh pìⁿ-chò yi ê tián-sī-tâi, Julia Fox boeh tī Bí-kok koh-chài án-ne.

這个 "未切寶石" 演員 tī 拜二 (9/4) 為 New York 時裝周開幕, 身穿落地烏風衣出席 Pretty Little Thing x Naomi Campbell 時裝 show. 

Chit-ê "Bōe-chhiat Pó-chio̍h" ián-oân tī pài-2 (9/4) ūi New York Sî-chong Chiu khai-bō͘, sin chhēng lo̍h-tē o͘ hong-i chhut-se̍k Pretty Little Thing x Naomi Campbell sî-chong show. 

翕相比 pose ê 時, 她掀開外套, 露出內面 kan-ta 是銀鍊奶帕配一領金屬 T 褲.

Hip-siòng pí pose ê sî, yi hian-khui gōa-thò, lō͘ chhut lāi-bīn kan-ta sī gîn-liān leng-phè phòe chi̍t-niá kim-sio̍k T-khò͘.

Fox ê 內衣是 New York 品牌 Seks ê 設計. 她 kō͘ 誇大 ê 眼線 hām 烏色唇膏來搭配這軀服裝.

Fox ê lāi-i sī New York phín-pâi Seks ê siat-kè. Yi kō͘ khoa-tāi ê gán-sòaⁿ hām o͘-sek tûn-ko lâi tah-phòe chit-su ho̍k-chong.

Fox 可能比任何其他明星 koh-khah 佮意 kā 所謂 "露體穿插" 潮流當做家己 ê 標誌.

Fox khó-lêng pí jīm-hô kî-thaⁿ bêng-seng koh-khah kah-ì kā só͘-ūi "lō͘-thé chhēng-chhah" tiâu-liû tòng-chò ka-tī ê piau-chì.

https://www.huffpost.com/entry/julia-fox-nyfw-silver-chain-bra-thong_n_64f8cf4be4b0c9c32dede20d

2023 年蘆竹舞圓滿結束

2023 年蘆竹舞圓滿結束

2023 Nî Lô͘-tek Bú Oân-bóan Kiat-sok

By Nokuzola Thwala, 2023-9-6, Eswatini Observer

[Umhlanga, mā 叫蘆竹舞慶會, 過去是 Swazi 國王一年一度選妃 ê 大日子, 一般 tī 8 月底 a̍h 9 月初舉行, 期間規禮拜.]

[Umhlanga, mā kiò Lô͘-tek Bú Khèng-hōe, kòe-khì sī Swazi kok-ông chi̍t-nî chi̍t-tō͘ soán-hui ê tōa ji̍t-chí, it-poaⁿ tī 8 goe̍h té a̍h 9 goe̍h chhe kí-hêng, kî-kan kui lé-pài.]

今年儀式進行到 9 月初 5, tī Ludzidzini 王宮, 有來自國內外 12 萬外名少女 tī 國王陛下 hām 貴賓面前展示多彩多姿 ê 蘆竹舞, 儀式進行到半暝才 tī 熱烈氣氛中結束.

Kin-nî gî-sek chìn-hêng kàu 9 goe̍h chhe 5, tī Ludzidzini Ông-kiong, ū lâi-chū kok-lāi-gōa 12 bān gōa miâ siàu-lú tī Kok-ông Pē-hā hām kùi-pin bīn-chêng tián-sī to-chhái to-chu ê lô͘-tek bú, gî-sek chìn-hêng kàu pòaⁿ-mê chiah tī jia̍t-lia̍t khì-hun tiong kiat-sok.

 

最後一工 ê 儀式 mā 吸引來自世界各地幾千名觀眾, ná 看 ná 讚嘆 chit 大陣少女 ê 精彩表演, 充分展示 Swazi 文化 ê 媠.

Chòe-āu chi̍t-kang ê gî-sek mā khip-ín lâi-chū sè-kài kok-tē kúi-chheng miâ koan-chiòng, ná khòaⁿ ná chàn-thàn chit tōa-tīn siàu-lú ê cheng-chhái piáu-ián, chhiong-hun tián-sī Swazi bûn-hòa ê súi.

http://new.observer.org.sz/details.php?id=21083 

科技按怎 teh 改變 Marathon 訓練

科技按怎 teh 改變 Marathon 訓練

Kho-ki Án-chóaⁿ teh Kái-piàn Marathon Hùn-liān

By Bard based on: Sean Mitchell, 2023-9-4, MakeUseOf.com

科技 tng-teh 改變咱人訓練 marathon ê 方式. 科技 ê 幫助予 marathon 運動員 ê 訓練比過去 lóng 較聰明, 較快速, 較安全. Che 會使協助 in 實現目標, 得著好成績. 下面是科技改變 marathon 訓練 ê 一寡具體方式:

Kho-ki tng-teh kái-piàn lán-lâng hùn-liān marathon ê hong-sek. Kho-ki ê pang-chō͘ hō͘ marathon ūn-tōng-oân ê hùn-liān pí kòe-khì lóng khah chhong-bêng, khah khoài-sok, khah an-choân. Che ē-sái hia̍p-chō͘ in si̍t-hiān bo̍k-piau, tit-tio̍h hó sêng-chek. Ē-bīn sī kho-ki kái-piàn marathon hùn-liān ê chi̍t-kóa kū-thé hong-sek:

- 掛身設備: 智慧手錶 hām 健身追蹤器 tt 掛身設備會當追蹤各種指標, 包括心率, 速度, 節奏, hām 距離. Kō͘ che 數據會當監測你 ê 訓練進度, koh 根據需要調整訓練 

- Kòa-sin siat-pī: tì-hūi chhiú-pió hām kiān-sin tui-chong-khì tt kòa-sin siat-pī ē-tàng tui-chong kok-chióng chí-piau, pau-koat sim-lu̍t, sok-tō͘, chiat-chàu, hām kī-lī. Kō͘ che sò͘-kì ē-tàng kàm-chhek lí ê hùn-liān chìn-tō͘, koh kin-kì su-iàu tiâu-chéng hùn-liān kè-ōe.

- 智慧服裝: Che 會使監測你走標 ê 姿勢, 提供實時 ê 回報. Án-ne 會當協助你發現 koh 改正跤步無效率 ê 所在, mā 避免傷害.

- Tì-hūi ho̍k-chong: Che ē-sái kàm-chhek lí cháu-pio ê chu-sè, thê-kiong si̍t-sî ê hôe-pò. Án-ne ē-tàng hia̍p-chō͘ lí hoat-hiān koh kái-chèng kha-pō͘ bô hāu-lu̍t ê só͘-chāi, mā pī-bián siong-hāi.

 

- 訓練 app hām online 教練: Chiah-ê 提供你個人化 ê 訓練計畫, 跟蹤你 ê 訓練進度, koh 提供激勵 hām 支持. 如果你是家己一人進行 marathon 訓練, che 將對你特別有幫贊.

- Hùn-liān app hām online kàu-liān: Chiah-ê thê-kiong lí kò-jîn-hòa ê hùn-liān kè-ōe, kin-chong lí ê hùn-liān chìn-tō͘, koh thê-kiong kek-lē hām chi-chhî. Jû-kó lí sī ka-tī chi̍t-lâng chìn-hêng marathon hùn-liān, che chiong tùi lí te̍k-pia̍t ū pang-chān.

- 虛擬現實: Che ē-sái 用來模擬 marathon 比賽 ê 體驗, 予你 tī 世界任何所在進行 marathon 訓練. Che 對訓練特別 ê 賽程 a̍h tī 比賽中得著心理優勢真有幫贊.

- Hi-gí hiān-si̍t: Che ē-sái iōng-lâi bô͘-gí marathon pí-sài ê thé-giām, hō͘ lí tī sè-kài jīm-hô só͘-chāi chìn-hêng marathon hùn-liān. Che tùi hùn-liān te̍k-pia̍t ê sài-têng a̍h tī pí-sài tiong tit-tio̍h sim-lí iu-sè chin ū pang-chān.

https://www.makeuseof.com/technology-changing-marathon-training/

Matt Roussel 參濫版畫 hām 繪畫, 創作迷人 ê 肖像

Matt Roussel 參濫版畫 hām 繪畫, 創作迷人 ê 肖像

Matt Roussel Chham-lām Pán-ōe hām hōe-ōe, Chhòng-chok Bê-lâng ê Siàu-siōng

By Kate Mothes, 2023-8-30, Colossal

Franse 藝術家 Matt Roussel, 是一位熱愛實驗 ê 版畫家, 不斷 hèng 新 ê 挑戰. Tī 伊系列畫 ê 木版, 伊 ùi 傳統 ê 印刷木版開始, 刻掉負空間, m̄-koh 無用油墨 kā he 印 tī 紙, 伊將製作過程轉化做藝術品本身.

Franse gē-su̍t-ka Matt Roussel, sī chi̍t-ūi jia̍t-ài si̍t-giām ê pán-ōe-ka, put-toān hèng sin ê thiau-chiàn. Tī i hē-lia̍t ōe ê bo̍k-pán, i ùi thoân-thóng ê ìn-soat bo̍k-pán khai-sí, khek-tiāu hū khong-kan, m̄-koh bô iōng iû-ba̍k kā he ìn tī chóa, i chiong chè-chok kòe-têng choán-hòa chò gē-su̍t-phín pún-sin.

Roussel 雕刻 ê 每件作品, 刻痕顯現唌人 ê 紋理. Tī 伊 ê 新作品, 主題人物 ê 面光滑, 需要靠繪畫來予伊性命, iá 雕刻 ê 位是留予大蕊花, 華麗服裝, hām ná 夢 ê 四周. "我欲考驗家己 ê 繪畫," I án-ne kā Colossal 講. "做仝款工課, 我真緊 tō siān ah."

Roussel tiau-khek ê múi-kiāⁿ chok-phín, khek-hûn hián-hiān siâⁿ-lâng ê bûn-lí. Tī i ê sin chok-phín, chú-tê jîn-bu̍t ê bīn kng-ku̍t, su-iàu khò hōe-ōe lâi hō͘ i sèⁿ-miā, iá tiau-khek ê ūi sī lâu hō͘ tōa-lúi hoe, hôa-lē ho̍k-chong, hām ná-bāng ê sì-chiu. "Góa boeh khó-giām ka-tī ê hōe-ōe," I án-ne kā Colossal kóng. "Chò kāng-khoán khang-khòe, góa chin kín tō siān ah."

主題 ê 靈感來自伊交予 AI 家私 ê 系列提示, án-ne 來生成排列 hām 圖案. "對我來講, che 是工課 ê 基礎, 予我會當 kō͘ 手完成我所看 ê... Che 是協助我 ê 新家私, 親像 ’90 年代我用電腦做 3D 作品," 伊講. 每件作品, 看大細, 需要 3-6 工 ê 時間去完成.

Chú-tê ê lêng-kám lâi chū i kau hō͘ AI ke-si ê hē-lia̍t thê-sī, án-ne lâi seⁿ-chiâⁿ pâi-lia̍t hām tô͘-àn. "Tùi góa lâi kóng, che sī khang-khòe ê ki-chhó͘, hō͘ góa ē-tàng kō͘ chhiú oân-sêng góa só͘ khòaⁿ ê... Che sī hia̍p-chō͘ góa ê sin ke-si, chhin-chhiūⁿ ’90 nî-tāi góa iōng tiān-náu chò 3D chok-phín," i kóng. Múi-kiāⁿ chok-phín, khòaⁿ tōa-sè, su-iàu 3-6 kang ê sî-kan khì oân-sêng.

https://www.thisiscolossal.com/2023/08/matt-roussel-woodblock-portraits/

Eros hām Psyche: 希臘神話中最偉大 ê 愛情故事

Eros hām Psyche: 希臘神話中最偉大 ê 愛情故事

Eros hām Psyche: Hilia̍p Sîn-ōe tiong Chòe Úi-tāi ê Ài-chêng Kò͘-sū

By Bard based on: Philip Chrysopoulos, 2023-8-30, Greek Reporter

Psyche /sái.ki/ 是媠 kah ná 仙 ê 凡間查某. 愛神 Aphrodite /a.fro.dái.ti/ 目赤 Psyche ê 美貌, tō 叫姻後生 Eros kō͘ 箭射 Psyche, 予她去愛著怪物. 

Psyche /sái.ki/ sī súi kah ná sian ê hān-kan cha-bó͘. Ài-sîn Aphrodite /a.fro.dái.ti/ ba̍k-chhiah Psyche ê bí-māu, tō kiò yin hāu-seⁿ Eros kō͘ chìⁿ siā Psyche, hō͘ yi khì ài tio̍h koài-bu̍t. 

 

M̄-koh, Eros 無小心去予家己 ê 箭鑿著, 煞去愛著 Psyche. 伊化身做怪物, 去 kap Psyche 結婚. Psyche 婚姻幸福, 受姊妹 ê 怨妒, 說服她著刣死彼个怪物翁.

M̄-koh, Eros bô sio-sim khì hō͘ ka-tī ê chìⁿ chha̍k tio̍h, soah khì ài-tio̍h Psyche. I hòa-sin chò koài-bu̍t, khì kap Psyche kiat-hun. Psyche hun-in hēng-hok, siū chí-mōe ê oàn-tò͘, soat-ho̍k yi tio̍h thâi-sí hit-ê koài-bu̍t ang.

Psyche 無小心 kā 燈油滴著 Eros ê 面, Eros 醒來, 緊飛走. Psyche kài 傷心, tō 去揣姻 tōa-ke Aphrodite, tōa-ke 交她做 3 項無可能 ê 任務, 才會得 kap Eros koh 相見.

Psyche bô sió-sim kā teng-iû tih tio̍h Eros ê bīn, Eros chhéⁿ-lâi, kín poe cháu. Psyche kài siong-sim, tō khì chhōe yin tōa-ke Aphrodite, tōa-ke kau yi chò 3 hāng bô khó-lêng ê jīm-bū, chiah ē-tit kap Eros koh sio-kìⁿ.

Psyche 得著狗蟻 hām 河神 ê 幫助, 完成前 2 項任務. 不過, tī 第3 任務, 她拍開 Aphrodite 叫她袂使拍開 ê 盒仔, chŏaⁿ 昏去.

Psyche tit-tio̍h káu-hiā hām Hô-sîn ê pang-chō͘, oân-sêng chêng 2-hāng jīm-bū. Put-kò, tī tē-3 jīm-bū, yi phah-khui Aphrodite kiò yi bē-sái phah-khui ê a̍p-á, chŏaⁿ hūn--khì.

Eros 揣著 Psyche, tō 求 Zeus 予她變做仙. Zeus 答應伊 ê 要求, 予 in 翁某 koh 做伙, 永遠幸福快樂.

Eros chhōe tio̍h Psyche, tō kiû Zeus hō͘ yi piàn-chò sian. Zeus tah-èng i ê iau-kiû, hō͘ in ang-bó͘ koh chò-hóe, éng-oán hēng-hok khoài-lo̍k.

https://greekreporter.com/2023/08/30/eros-cupid-psyche-love-story-greek-mythology/

昆蟲造成 ê 千手觀音

昆蟲造成 ê 千手觀音

Khun-thiông Chō-sêng ê Chhian-chhiú Koan-im

By Bard based on Atlas Obscura

Tī Japan Itakura (板倉), 有一尊 kō͘ 20,000 隻昆蟲組成 ê 觀音菩薩神像. 這座雕像號做 "Konchū Senju-Kannon" (昆虫千手観音). Che 是由 Inamura (稲村) Ss 經過 6 年時間所創造.

Tī Japan Itakura (板倉), ū chi̍t-chun kō͘ 20,000 chiah khun-thiông cho͘-sêng ê koan-im phô͘-sat sîn-siōng. Chit-chō tiau-siōng hō-chò "Konchū Senju-Kannon" (昆虫千手観音). Che sī iû Inamura (稲村) Ss keng-kòe 6 nî sî-kan só͘ chhòng-chō.

雕像由龜仔, 蝶仔, 蛾仔 tt 無仝種類 ê 昆蟲所組成. 龜仔上特別, kō͘ in 來製作觀音 ê 身軀, 頭毛, hām 服裝. 蝶仔 hām 蛾仔用來製作觀音 ê 光環 hām 頭冠.

Tiau-siōng iû ku-á, ia̍h-á, ngô͘-á tt bô-kāng chéng-lūi ê khun-thiông só͘ cho͘-sêng. Ku-á siōng te̍k-pia̍t, kō͘ in lâi chè-chok koan-im ê sin-khu, thâu-mo͘, hām ho̍k-chong. Ia̍h-á hām ngô͘-á iōng-lâi chè-chok koan-im ê kng-khoân hām thâu-koan.

Che 雕像是一尊 mushi kuyoo (虫供養) 作品, 是日本佛教紀念蟲豸 ê 傳統, 獻予毋管因為殺蟲劑 a̍h 採集標本予人殺死 ê 蟲豸.

Che tiau-siōng sī chi̍t-chun mushi kuyoo (虫供養) chok-phín, sī Ji̍t-pún Hu̍t-kàu kì-liām thâng-thōa ê thoân-thóng, hiàn hō͘ m̄-koán in-ūi sat-thâng-che a̍h chhái-chi̍p piau-pún hō͘ lâng sat-sí ê thâng-thōa.

有人認為這尊雕像是藝術品, 另外 mā 有人認為 che 予人夯雞母皮. 不而過, 這尊雕像總是坐 tī 暗毿 ê 烏影內, 恬恬對小生物充滿憐憫.

Ū-lâng jīn-ûi chit-chun tiau-siōng sī gē-su̍t-phín, lēng-gōa mā ū-lâng jīn-ûi che hō͘ lâng giâ ke-bó-phôe. Put-jî-kò, chit-chun tiau-siōng chóng-sī chē tī àm-sàm ê o͘-iáⁿ lāi, tiām-tiām tùi sió seng-bu̍t chhiong-móa liân-bín.

這尊神像提醒咱, 所有 ê 性命互相關連, 甚至上細 ê 生物 mā 值得咱 ê 同情. 伊 mā 予咱思考, 咱人 kap 自然世界 ê 關係, 以及咱人著按怎才會當久久長長生存.

Chit-chun sîn-siōng thê-chhéⁿ lán, só͘-ū ê sèⁿ-miā hō͘-siong koan-liân, sīm-chì siōng-sè ê seng-bu̍t mā ta̍t-tit lán ê tông-chêng. I mā hō͘ lán su-khó, lán-lâng kap chū-jiân sè-kài ê koan-hē, í-ki̍p lán-lâng tio̍h án-chóaⁿ chiah ē-tàng kú-kú tn̂g-tn̂g seng-chûn.

https://www.atlasobscura.com/places/konchu-senju-kannon-japan

減輕老人護理壓力 ê 動力外骨骼

Kiám-khin lāu-lâng hō͘-lí ap-le̍k ê tōng-le̍k gōa-kut-keh

By Paul Ridden, 2023-8-31, New Atlas

大部份 German Bionic 公司 ê 動力服設計, 是欲協助工業設施內 ê 工人, 但 in 上新 ê 設備是欲支持病院, 老人中心 a̍h 復健單位 ê 醫護人員.

Tōa pō͘-hūn German Bionic kong-si ê tōng-le̍k-ho̍k siat-kè, sī boeh hia̍p-chō͘ kang-gia̍p siat-si lāi ê kang-lâng, tān in siōng-sin ê siat-pī sī boeh chi-chhî pēⁿ-īⁿ, lāu-lâng tiong-sim a̍h ho̍k-kiān tan-ūi ê i-hō͘ jîn-oân.

綴今年 6 月 tī Paris VivaTech 2023 展覽推出 ê "支持護理人員日常工作" ê 產品了後, German Bionic taⁿ koh 向 Pak Amerika 市場推出 Apogee+ 動力外骨骼

Tòe kin-nî 6 goe̍h tī Paris VivaTech 2023 tián-lám thui-chhut ê "chi-chhî hō͘-lí jîn-oân ji̍t-siông kang-chok" ê sán-phín liáu-āu, German Bionic taⁿ koh hiòng Pak Amerika chhī-tiûⁿ thui-chhut Apogee+ tōng-le̍k gōa-kut-keh

He 是一个 "個人徙位輔助," 適合需要扭搦患者, 養老院住民, a̍h 接受物理治療 ê 人 ê 護士, 看護, a̍h 醫護人員 -- 免得冒扭著 a̍h 傷著家己 ê 風險, mā 毋免用著複雜 ê 輔助設備 (cck 吊帶 hām 起動機).

He sī chi̍t-ê "kò-jîn sóa-ūi hú-chō͘," sek-ha̍p su-iàu liú-la̍k hoān-chiá, ióng-ló-īⁿ chū-bîn, a̍h chiap-siū bu̍t-lí tī-liâu ê lâng ê hō͘-sū, khàn-hō͘, a̍h i-hō͘ jîn-oân -- bián-tit mō͘ ngiú-tio̍h a̍h siong-tio̍h ka-tī ê hong-hiám, mā m̄-bián iōng tio̍h ho̍k-cha̍p ê hú-chō͘ siat-pī (cck tiàu-tòa hām khí-tāng-ki).

完整 ê spec 猶未公布, 但聽講 che 外骨服每改徙位會得 ūi 背部省力達 30 kg, koh 有主動 kiâⁿ-tāng 支持, mā 有腿帶 hām 䘥仔, 大細 thang 適合用戶 ê 身材. Tī 單體骨架 ê 後向有手扞, tī 徙位操作中間方便患者扞手.

Oân-chéng ê spec iáu bōe kong-pò͘, tān thiaⁿ-kóng che gōa-kut-ho̍k múi-kái sóa-ūi ē-tit ūi pōe-pō͘ séng-la̍t ta̍t 30 kg, koh ū chú-tōng kiâⁿ-tāng chi-chhî, mā ū thúi-tòa hām kah-á, tōa-sè thang sek-ha̍p iōng-hō͘ ê sin-châi. Tī tan-thé kut-kè ê āu-hiòng ū chhiú-hōaⁿ, tī sóa-ūi chhau-chok tiong-kan hong-piān hoān-chiá hōaⁿ chhiú.

Apogee+ 有 IP54 防水等級, 設備 tī 看護人員為患者洗盪 ê 時免遮, 免崁. 根據報導, 這種構造有 "較細 ê 面積牢細菌 a̍h 病菌," mā 較簡單消毒.

Apogee+ ū IP54 hông-chúi téng-kip, siat-pī tī khàn-hō͘ jîn-oân ūi hoān-chiá sé-tn̄g ê sî bián jia, bián khàm. Kin-kì pò-tō, chit-chióng kò͘-chō ū "khah-sè ê bīn-chek tiâu sè-khún a̍h pēⁿ-khún," mā khah kán-tan siau-to̍k.

https://newatlas.com/robotics/german-bionic-apogee-plus-powered-exoskeleton/