"世界上大" 3D 印刷建築

"世界上大" 3D 印刷建築 tī Florida 得欲完工

"Sè-kài siōng-tōa" 3D ìn-soat kiàn-tio̍k tī Florida tit-boeh oân-kang

By Adam Williams, 2023-7-4

親像 Texas Austin ê 100 厝開發, hām NASA ê 火星居住地 tt chiah-ê 專案, 已經𤆬頭予 3D 印刷建築 tī 美國起飛. 另外一个重要 ê 里程碑是, Printed Farms 這間公司得欲完成伊所講 ê 世界上大 ê 3D 印刷建築, tī 這間 "博爽馬房," 面積約 940 平米.

Chhin-chhiūⁿ Texas Austin ê 100-chhù khai-hoat, hām NASA ê Hóe-chheⁿ ki-chū-tē tt chiah-ê choan-àn, í-keng chhōa-thâu hō͘ 3D ìn-soat kiàn-tio̍k tī Bí-kok khí-poe. Lēng-gōa chi̍t-ê tiōng-iàu ê lí-têng-pi sī, Printed Farms chit-keng kong-si tit-boeh oân-sêng i só͘-kóng ê sè-kài siōng-tōa ê 3D ìn-soat kiàn-tio̍k, tī chit-keng "phok-sóng bé-pâng," bīn-chek iok 940 pêng-bí.

先莫 koh 管公司 ê 大話, 照阮所知, 這个專案確實是世界上大 ê 3D 印刷建築, m̄-koh 這是緊速發展 ê 技術, 可能有另外公司 tng-teh 做閣較大 ê 案件.

Seng mài koh koán kong-si ê tōa-ōe, chiàu goán só͘ chai, chit-ê choan-àn khak-si̍t sī sè-kài siōng-tōa ê 3D ìn-soat kiàn-tio̍k, m̄-koh che sī kín-sok hoat-tián ê ki-su̍t, khó-lêng ū lēng-gōa kong-si tng-teh chò koh-khah tōa ê àn-kiāⁿ.

這个單層 ê 構造長 47 米, 闊 25 米, 懸 4 米. Printed Farms 使用一台  COBOD BOD2 3D 印刷機, he mā 是用來起 Europa 第一間兩樓徛家厝 ê 3D 印刷設備.

Chit-ê tan-chàn ê kò͘-chō tn̂g 47 bí, khoah 25 bí, koân 4 bí. Printed Farms sú-iōng chi̍t-tâi  COBOD BOD2 3D ìn-soat-ki, he mā sī iōng lâi khí Europa tē-it keng nn̄g-lâu khia-ke chhù ê 3D ìn-soat siat-pī.

一般 ê 3D 印刷專案, 照阮 ê 報導, 過程包括複雜 ê 自動機, ùi 噴喙泏出 ná 水泥 ê 混合物, 一沿一沿造出厝壁. 當然, 這台印刷機無大 kah 會當一輪 tō kā 規間馬房造好, 煞著 kā 分做幾若節, 先做厝 ê 雙頭, 才 koh 做中央節. 阮毋知規个工程著偌久, m̄-koh 阮知影, 完成 297 平米著 18 工.

It-poaⁿ ê 3D ìn-soat choan-àn, chiàu goán ê pò-tō, kòe-têng pau-koat ho̍k-cha̍p ê chū-tōng-ki, ùi phùn-chhùi chuh-chhut ná chúi-nî ê hūn-ha̍p-bu̍t, chi̍t-iân chi̍t-iân chō chhut chhù-piah. Tong-jiân, chit-tâi ìn-soat-ki bô tōa kah ē-tàng chi̍t-lûn tō kā kui-keng bé-pâng chō hó, soah tio̍h kā hun-chò kúi-ā chat, seng chò chhù ê siang-thâu, chiah koh chò tiong-ng chat. Goán m̄-chai kui-ê kang-têng tio̍h gōa kú, m̄-koh goán chai-iáⁿ, oân-sêng 297 pêng-bí tio̍h 18 kang.

https://newatlas.com/architecture/printed-farms-horse-barn-worlds-largest-cobod/