India 軍方看 he 懸懸 Kashmir 橋是 "改變輸贏一步棋"
India kun-hong khòaⁿ he koân-koân Kashmir kiô sī "kái-piàn su-iâⁿ chi̍t-pō͘ kî"
By Quratulain Rehbar, 2023-7-23, Nikkei Asia
New Delhi -- 經過 15 年 ê 起造, koh 幾個月, India tī Kashmir ê 世界上懸鐵路橋 tō 欲正式通車 -- 這是系列基礎建設升級 ê 上新一項, 目的是欲整合這个有爭議 ê 孤立地區, 同時加強國防.
New Delhi -- Keng-kòe 15 nî ê khí-chō, koh kúi-kò goe̍h, India tī Kashmir ê sè-kài siōng-koân thih-lō͘ kiô tō boeh chèng-sek thong-chhia -- che sī hē-lia̍t ki-chhó͘ kiàn-siat seng-kip ê siōng-sin chi̍t-hāng, bo̍k-tek sī boeh chéng-ha̍p chit-ê ū cheng-gī ê ko͘-li̍p tē-khu, tông-sî ka-kiông kok-hông.
懸 359 米, Chenab 鐵路橋迒過仝名 ê 河, 比 Paris ê Eiffel 鐵塔懸 29 米. 根據 India 鐵路部, 這个鐵路橋欲 tī 12 月 a̍h 2024 年 1 月通車, 政府表示, 通車將帶來 Kashmir ê "繁榮."
Koân 359 bí, Chenab Thih-lō͘ Kiô hāⁿ-kòe kāng-miâ ê hô, pí Paris ê Eiffel Thih-thah koân 29 bí. Kin-kì India Thih-lō͘ Pō͘, chit-ê thih-lō͘ kiô boeh tī 12-goe̍h a̍h 2024-nî 1-goe̍h thong-chhia, chèng-hú piáu-sī, thong-chhia chiong tòa-lâi Kashmir ê "hoân-êng."
彼 mā 會帶來軍方 ê 重大戰略利益. 這座橋將確保 tī cpt 各種氣候 lóng 會得到 m̄-nā Kashimir (這个地區是 India kap Pakistan 對敵 ê 焦點, Pakistan 講彼是 in ê 領土), mā 會得到 Ladakh, hia 是 kap China 緊張 ê 邊界.
He mā ē tòa-lâi kun-hong ê tiōng-tāi chiàn-lio̍k lī-ek. Chit-chō kiô chiong khak-pó tī cpt kok-chióng khì-hāu lóng ē-tit kàu m̄-nā Kashimir (chit-ê tē-khu sī India kap Pakistan tùi-te̍k ê chiau-tiám, Pakistan kóng he sī in ê léng-thó͘), mā ē-tit kàu Ladakh, hia sī kap China kín-tiuⁿ ê pian-kài.
"這真正會得定輸贏, 毋管軍事能力 a̍h 是當地貿易 kap 觀光 lóng 仝款," India 陸軍前北部指揮官 D.S. Hooda án-ne 講. 伊講, he 將幫贊 Kashmir 居民搬運 in ê língò hām 其他產品, 同時予軍方有一條運部隊 kap 裝備 ê 快速路線.
"Che chin-chiàⁿ ē-tit tēng su-iâⁿ, m̄-koán kun-sū lêng-le̍k a̍h sī tong-tē bō͘-e̍k kap koan-kong lóng kāng-khoán," India Lio̍k-kun chêng pak-pō͘ chí-hui-koaⁿ D.S. Hooda án-ne kóng. I kóng, he chiong pang-chān Kashmir ki-bîn poaⁿ-ūn in ê língò hām kî-thaⁿ sán-phín, tông-sî hō͘ kun-hong ū chi̍t-tiâu ūn pō͘-tūi kap chong-pī ê khoài-sok lō͘-sòaⁿ.
No comments:
Post a Comment