Dubai logo 繼續議論紛紛

Dubai logo 繼續議論紛紛

Dubai logo kè-sio̍k gī-lūn hun-hun

By Joseph Foley, 2023-7-19, Creative Bloq

若欲 tī 世界各地宣傳一个國家 a̍h 城市, in ê 觀光 logo* 定著愛有相當 ê 通用性. 有時陣, 國家揀一个圖形標誌來克服文字障礙, a̍h 是 kā he kap 文字連用, tī 無仝市場用無仝 ê 文字. M̄-koh, 上四常 ê 是, kā 英語國名當做國際使用 ê 基本. [* logo = 標誌]

Nā boeh tī sè-kài kok-tē soan-thoân chi̍t-ê kok-ka a̍h siâⁿ-chhī, in ê koan-kong logo* tiāⁿ-tio̍h ài ū siong-tong ê thong-iōng-sèng. Ū-sî-chūn, kok-ka kéng chi̍t-ê tô͘-hêng piau-chì lâi khek-ho̍k bûn-jī chiòng-gāi, a̍h sī kā he kap bûn-jī liân-iōng, tī bô kāng chhī-tiûⁿ iōng bô kāng ê bûn-jī. M̄-koh, siōng sù-siông ê sī, kā Eng-gí kok-miâ tòng-chò kok-chè sú-iōng ê ki-pún. [* logo = piau-chì]

觀光是 Dubai 重要 ê 經濟 mortor*, 而且國內 koh 有濟濟國際人士, 設計一个有最大國際吸引力 ê logo, 對 Dubai 是合情合理. [* motor /mó͘.tà/ = 發動機]

Koan-kong sī Dubai tiōng-iàu ê keng-chè mortor*, jî-chhiáⁿ kok-lāi koh ū chē-chē kok-chè jîn-sū, siat-kè chi̍t-ê ū chòe-tōa kok-chè khip-ín-le̍k ê logo, tùi Dubai sī ha̍p-chêng ha̍p-lí. [* motor /mó͘.tà/ = hoat-tōng-ki]

Dubai 提出一个真巧 ê 解決方案: 一个結合 Roma 字母和 Arab 文字 ê logo 來表達國名. M̄-koh, 有 ê 人懷疑, án-ne 敢真正有效?

Dubai thê-chhut chi̍t-ê chin khiáu ê kái-koat hong-àn: chi̍t-ê kiat-ha̍p Roma jī-bó hām Arab bûn-jī ê logo lâi piáu-ta̍t kok-miâ. M̄-koh, ū ê lâng hoâi-gî, án-ne kám chin-chiàⁿ ū-hāu?

Tī 濟濟 Europa 語言, Dubai ê 名稱 lóng 仝款. In ê logo kō͘ 藍色來顯示這个名, m̄-koh kā 疊 "Dubai" ê Arab 文, 規个設計 ê 外觀 koh 真鬥搭. 結果, 這个 logo 世界大部份 lóng 讀有, ùi Amerika 到中東, 以及其他 tt*. [* tt = 等等]

Tī chē-chē Europa gí-giân, Dubai ê miâ-chheng lóng kāng-khoán. In ê logo kō͘ nâ-sek lâi hián-sī chit-ê miâ, m̄-koh kā tha̍h "Dubai" ê Arab-bûn, kui-ê siat-kè ê gōa-koan koh chin tàu-tah. Kiat-kó, chit-ê logo sè-kài tōa pō͘-hūn lóng tha̍k-ū, ùi Amerika kàu Tiong-tang, í-ki̍p kî-thaⁿ tt*. [* tt = téng-téng]

https://www.creativebloq.com/news/dubai-logo