Japan 人口減少, 提供機會走離緊張 ê 都市生活

Japan 人口減少, 提供機會走離緊張 ê 都市生活

Japan jîn-kháu kiám-chió, thê-kiong ki-hōe cháu-lī kín-tiuⁿ ê to͘-chhī seng-oa̍h

By David McElhinney, 2023-7-14,  Al Jazeera

Tokyo, Japan -- Reiko Ishimoto 和她 ê 伴侶 Allen Lindskoog tī Tokyo 過無閒 chhih-chhih 生活 ê 時, in 毋捌想過去庄跤過一个平靜 ê 生活.

Tokyo, Japan -- Reiko Ishimoto hām yi ê phōaⁿ-lū Allen Lindskoog tī Tokyo kòe bô-êng chhih-chhih seng-oa̍h ê sî, in m̄-bat siūⁿ-kòe khì chng-kha kòe chi̍t-ê pêng-chēng ê seng-oa̍h.

毋過, 兩翁仔某坐 tī in 翻新 ê 木造庄跤厝 ê 砛簷跤, 有崁瓦斜厝頂, 石頭 ê 地基, koh 有竹仔林, 彼時 in ê 滿足心情是感受會到 ê.

M̄-koh, nn̄g ang-á-bó͘ chē tī in hoan-sin ê bo̍k-chō chng-kha chhù ê gîm-chîⁿ-kha, ū khàm hiā siâ chhù-téng, chio̍h-thâu tē-ki, koh ū tek-á-nâ, hit-sî in ê boán-chiok sim-chêng sī kám-siū ē-kàu ê.

"我厭僐 tī 都市逐工做到暗時 10 a̍h 11 點, koh 著趕時間搭火車," Ishimoto kā Al Jazeera 講. "我愛大自然, 所致我感覺 tī 山 nih 有一間厝是袂䆀 ê 想法."

"Góa ià-siān tī to͘-chhī ta̍k-kang chò kàu àm-sî 10 a̍h 11 tiám, koh tio̍h kóaⁿ sî-kan tah hóe-chhia," Ishimoto kā Al Jazeera kóng. "Góa ài tāi chū-jiân, só͘-tì góa kám-kak tī soaⁿ-nih ū chi̍t-keng chhù sī bē-bái ê siūⁿ-hoat."

"精差在 tī 日時和暗時 ê 無仝," Lindskoog 表示同意, 來 Tokyo 進前伊蹛 tī New York. "你開始注意著, [都市生活] 真無自然."

"Cheng-chha chāi tī ji̍t-sî hām àm-sî ê bô-kāng," Lindskoog piáu-sī tông-ì, lâi Tokyo chìn-chêng i tòa tī New York. "Lí khai-sí chù-ì tio̍h, [to͘-chhī seng-oa̍h] chin bô chū-jiân."

這對翁某是 lú 來 lú 濟去 Japan 庄跤買無人蹛 ê 厝 ê 一个例, 其中真濟是外國人.

Chit-tùi ang-bó͘ sī lú lâi lú chē khì Japan chng-kha bé bô-lâng tòa ê chhù ê chi̍t-ê lē, kî-tiong chin chē sī gōa-kok lâng.

 

這个趨勢對應著 Japan 所面對 ê 嚴重人口減少: Japan 人口預測 tī 50 年內 ùi 目前 ê 1.25 億勼縮到 8,700 萬.

Chit-ê chhu-sè tùi-èng tio̍h Japan só͘ bīn-tùi ê giâm-tiōng jîn-kháu kiám-chió: Japan jîn-kháu ī-chhek tī 50 nî lāi ùi bo̍k-chêng ê 1.25 ek kiu-sok kàu 8,700 bān.

庄跤 ê 人口減少, 加上人才流向大都市, 造成 Japan 庄跤所在有濟濟 ê "鬼仔庄."

Chng-kha ê jîn-kháu kiám-chió, ka-siōng jîn-châi lâu hiòng tōa to͘-chhī, chō-sêng Japan chng-kha só͘-chāi ū chē-chē ê "kúi-á chng."

https://www.aljazeera.com/economy/2023/7/14/japans-abandoned-homes-become-refuge-for-stressed-city-dwellers