醫生 koh 鬥好車禍後 ê 囡仔頭, 佳哉有 "神奇" ê 手術

醫生 koh 鬥好車禍後 ê 囡仔頭, 佳哉有 "神奇" ê 手術

I-seng koh tàu-hó chhia-hō āu ê gín-á thâu, ka-chài ū "sîn-kî" ê chhiú-su̍t

By Peter Aitken, 2023-7-13, Fox News

Jerusalem 一間病院這禮拜宣布, Israel 外科醫生實施一項奇蹟手術, 成功 kā 一个騎鐵馬予自動車挵著 ê 查埔囡仔 ê 頭殼 koh 鬥倒轉.

Jerusalem chi̍t-keng pēⁿ-īⁿ chit lé-pài soan-pò͘, Israel gōa-kho i-seng si̍t-si chi̍t-hāng kî-chek chhiú-su̍t, sêng-kong kā chi̍t-ê khiâ thih-bé hō͘ chū-tōng-chhia lòng tio̍h ê cha-po͘ gín-á ê thâu-khak koh tàu tò-tńg.

根據 "Israel 時報", Suleiman Hassan 是蹛西岸 ê 12 歲 Palestine 人. 伊 ê 頭骨和龍骨上頂節頸椎骨分離, 這叫做 "內斷頭" -- 正式叫做 "雙側寰枕關節脫位" (bilateral atlanto occipital joint dislocation).

Kin-kì "Israel Sî-pò", Suleiman Hassan sī tòa Se-hōaⁿ ê 12-hòe Palestine lâng. I ê thâu-kut hām liông-kut siōng téng-chat kēng-chui-kut hun-lī, che kiò-chò "lāi tn̄g-thâu" -- chèng-sek kiò-chò "siang-chhek hoân-chím koan-chat thoat-ūi" (bilateral atlanto occipital joint dislocation).

Hassan tng-teh 騎跤踏車, 予一隻汽車挵著. 伊即刻 hông 送到 Hadassah 醫學中心, tī hia 隨接受創傷科 ê 手術. 醫生講, 伊 ê 頭殼 "和頷頸 cpt* 完全分開." [* cpt = chha-put-to]

Hassan tng-teh khiâ kha-ta̍h-chhia, hō͘ chi̍t-chiah khì-chhia lòng-tio̍h. I chek-khek hông sàng kàu Hadassah I-ha̍k Tiong-sim, tī hia sûi chiap-siū chhòng-siong kho ê chhiú-su̍t. I-seng kóng, i ê thâu-khak "hām ām-kún cpt* oân-choân hun-khui." [* cpt = chha-put-to]

主持手術 ê 骨科專家 Ohad Einav 醫師講, 手術過程著幾若點鐘, 需要 tī "受傷部位使用新 ê 鋼片 kap 固定."

Chú-chhî chhiú-su̍t ê kut-kho choan-ka Ohad Einav I-su kóng, chhiú-su̍t kòe-têng tio̍h kúi-ā tiám-cheng, su-iàu tī "siū-siong pō͘-ūi sú-iōng sin ê kǹg-phìⁿ kap kò͘-tēng."

https://www.foxnews.com/world/doctors-reattach-boys-head-car-accident-thanks-amazing-surgery