對一寡 Ukraina 查某, 畫圖是幫助姻應對失落 ê 一種治療
Tùi chi̍t-kóa Ukraina cha-bó͘, ōe-tô͘ sī pang-chō͘ yin èng-tùi sit-lo̍h ê chi̍t-chióng tī-liâu
By Hanna Arhirova, 2023-7-14
Kyiv, Ukraina (AP) -- Tī 一間照日 ê 畫室, 排滿畫架 kap 畫布, Iryna Farion tng-teh kā 一幅主調是暗藍色 kap 暗棕色 ê 油畫做最後 ê 收尾.
Kyiv, Ukraina (AP) -- Tī chi̍t-keng chiò-ji̍t ê ōe-sek, pâi móa ōe-kè kap ōe-pò͘, Iryna Farion tng-teh kā chi̍t-pak chú-tiāu sī àm nâ-sek kap àm chang-sek ê iû-ōe chò chòe-āu ê siu-bóe.
這幅圖描繪兩叢交插做伙 ê 樹仔, 樹根絚絚相攬, 黃色日光照 tī 憂鬱 ê 藍色背景.
Chit-pak tô͘ biâu-hōe nn̄g-châng kau-chhap chò-hóe ê chhiū-á, chhiū-kin ân-ân sio- lám, n̂g-sek ji̍t-kng chiò tī iu-ut ê nâ-sek pōe-kéng.
"我感覺這是我 kap 阮死 tī 戰爭 ê 翁," Farion 講起這兩叢樹. "In ná 像是兩个靈魂, ná 兩粒心, ná 一个身軀."
"Góa kám-kak che sī góa kap goán sí tī chiàn-cheng ê ang," Farion kóng khí chit nn̄g-châng chhiū. "In ná-chhiūⁿ sī nn̄g-ê lêng-hûn, ná nn̄g-lia̍p sim, ná chi̍t-ê sin-khu."
Kap 幾萬个失去伴侶 ê Ukraina 查某仝款, 姻 ê 翁死 tī 自 17 個月前 Russia 對 in 國家所發動 ê 戰爭. 幾十萬 Ukraina 人已經死 tī 戰場 -- in 大部份原本過 kài 平常 ê 生活, 為著家己 ê 國家煞著放下一切加入戰爭.
Kap kúi-bān ê sit-khì phōaⁿ-lū ê Ukraina cha-bó͘ kāng-khoán, yin ê ang sí tī chū 17-kò goe̍h chêng Russia tùi in kok-ka só͘ hoat-tōng ê chiàn-cheng. Kúi-cha̍p bān Ukraina lâng í-keng sí tī chiàn-tiûⁿ -- in tōa pō͘-hūn goân-pún kòe kài pêng-siông ê seng-oa̍h, ūi-tio̍h ka-tī ê kok-ka soah-tio̍h pàng-hā it-chhè ka-ji̍p chiàn-cheng.
Farion 姻翁 Oleksandr Alimov, tī 12 月死 tī Donetsk 前線. 禁不住 ê 傷心, 她講, 她 ùi 畫圖揣著安慰, 和仝款翁婿死 tī 戰場 ê 查某同齊畫.
Farion yin ang Oleksandr Alimov, tī 12 goe̍h sí tī Donetsk chiân-sòaⁿ. Kìm put-chū ê siong-sim, yi kóng, yi ùi ōe-tô͘ chhōe tio̍h an-ùi, hām kāng-khoán ang-sài sí tī chiàn-tiûⁿ ê cha-bó͘ tâng-chê ōe.
No comments:
Post a Comment