藝術家公開 kō͘ AI 來加強原創圖畫

藝術家公開 kō͘ AI 做創作家私來加強原創圖畫

Gē-su̍t-ka Kong-khai kō͘ AI chò Chhòng-chok Ke-si lâi Ka-kiông Goân-chhòng Tô͘-ōe

By Jessica Stewart, 2023-7-15

濟濟藝術家閃避 AI*, 數位藝術家 Cy Teh 佮意 AI ê 創造能力. Kā AI 混合伊 ê 數位圖畫, 伊創造出獨特 ê 混合媒體 ê 藝術作品, 予伊 ê 藝術性夯到一个新坎站. [* AI /e.ái/ = 人工智慧]

Chē-chē gē-su̍t-ka siám-phiah AI*, sò͘-ūi gē-su̍t-ka Cy Teh kah-ì AI ê chhòng-chō lêng-le̍k. Kā AI hūn-ha̍p i ê sò͘-ūi tô͘-ōe, i chhòng-chō chhut to̍k-te̍k ê hūn-ha̍p mûi-thé ê gē-su̍t chok-phín, hō͘ i ê gē-su̍t-sèng giâ kàu chi̍t-ê sin khám-chām. [* AI /e.ái/ = jîn-kang tì-hūi]

Kap 一寡掩崁使用這款新科技 ê 創造者無仝, Teh 公開伊 ê 創作過程. Tī 伊 Instagram ê 簡介伊 án-ne 寫: "所謂藝術家 + AI." 另外, 所有 Teh ê 帖仔 lóng 有說明, 清楚解說講, chiah-ê 圖 是伊手畫 加 AI ê 結合. 

Kap chi̍t-kóa am-khàm sú-iōng chit-khoán sin kho-ki ê chhòng-chō-chiá bô-kāng, Teh kong-khai i ê chhong-chok kòe-têng. Tī i Instagram ê kán-kài i án-ne siá: "Só͘-ūi gē-su̍t-ka + AI." Lēng-gōa, só͘-ū Teh ê thiap-á lóng ū soeh-bêng, chheng-chhó kái-soeh kóng, chiah-ê tô͘ sī i chhiú-ōe ke AI ê kiat-ha̍p. 

"我欲繼續向前, 學每一个領域 ê 優點," 說明 koh án-ne 講. "我希望 tī 這个平台 kap 你分享快樂. 這若得罪著你, 我誠心 kā 你 hōe 失禮."

"Góa boeh kè-sio̍k hiòng chêng, o̍h múi chi̍t-ê léng-he̍k ê iu-tiám," soeh-bêng koh án-ne kóng. "Góa hi-bāng tī chit-ê pêⁿ-tâi kap lí hun-hióng khoài-lo̍k. Che nā tek-chōe tio̍h lí, góa sêng-sim kā lí hōe sit-lé."

Teh 引人思考 ê 作品講出 AI ê 優勢, 咱會得按怎 kō͘ he 來加強創造力, 毋是偷提想法 a̍h 唬弄大眾. 伊畫 ê 男女老幼肖像真迷人, 予觀眾好玄作品後面 ê 故事.

Teh ín-lâng su-khó ê chok-phín kóng-chhut AI ê iu-sè, lán ē-tit án-chóaⁿ kō͘ he lâi ka-kiông chhòng-chō-le̍k, m̄-sī thau-the̍h siūⁿ-hoat a̍h hó͘-lāng tāi-chiòng. I ōe ê lâm-lú ló-iù siàu-siōng chin bê-lâng, hō͘ koan-chiòng hòⁿ-hiân chok-phín āu-bīn ê kò͘-sū.

Tō 是 chiah-ê 人性面予 Teh ê 數位藝術超脫咱平時看著 ê AI. 這予阮好玄, tō kap 伊講起伊用這種技術, 以及大眾對這種技術 ê 接受. 請讀阮 ê 獨家訪問.

Tō sī chiah-ê jîn-sèng bīn hō͘ Teh ê sò͘-ūi gē-su̍t chhiau-thoat lán pêng-sî khòaⁿ-tio̍h ê AI. Che hō͘ goán hòⁿ-hiân, tō kap i kóng-khí i iōng chit-chióng ki-su̍t, í-ki̍p tāi-chiòng tùi chit-chióng ki-su̍t ê chiap-siū. Chhiáⁿ tha̍k goán ê to̍k-ka hóng-būn.

https://mymodernmet.com/cy-teh-ai-mixed-media-drawings/