動物園乾坤大轉踅, "公 ê" 大猩猩意外生查某嬰

Columbus 動物園乾坤大轉踅, "公 ê" 大猩猩意外生查某嬰

Columbus Tōng-bu̍t Hn̂g Khiân-khun Tōa Tńg-se̍h, "Kang ê" Tōa Seng-seng Ì-gōa Seⁿ Cha-bó͘ Eⁿ

By Nikki Dobrin, 2023-7-21, People

Ohio 一間動物園 tī 一隻西部低地大猩猩出世了後才發現, 嬰仔 ê 老母毋是公 ê (管理員起初 án-ne 認為), 煞是母 ê.

Ohio chi̍t-keng tōng-bu̍t-hn̂g tī chi̍t-chiah se-pō͘ kē-tē tōa-seng-seng chhut-sì liáu-āu chiah hoat-hiān, eⁿ-á ê lāu-bú m̄-sī kang-ê (koán-lí-oân khí-chho͘ án-ne jīn-ûi), soah sī bó-ê.

  

嬰仔 ê 老母是叫做 Sully ê 8 歲靈長動物, 自 2019 tō 蹛 tī Columbus 動物園. 逐个 lóng 想講伊是公 ê -- 一直到拜四 (20) 早, 看護人員來到櫳仔內, 發現伊意外抱一个嬰仔.

Eⁿ-á ê lāu-bú sī kiò-chò Sully ê 8-hòe lêng-tn̂g tōng-bu̍t, chū 2019 tō tòa tī Columbus Tōng-bu̍t-hn̂g. Ta̍k-ê lóng siūⁿ-kóng i sī kang-ê -- it-ti̍t kàu pài-sì (20) chá, khàn-hō͘ jîn-oân lâi kàu lông-á-lāi, hoat-hiān i ì-gōa phō chi̍t-ê eⁿ-á.

下面是貼 tī 動物園官方 Facebook ê 告示: 

Ē-bīn sī tah tī Tōng-bu̍t-hn̂g koaⁿ-hong Facebook ê kò-sī: 

"阮今仔日欲分享一个可愛 ê 大驚喜! 阮 ê 大猩猩家庭有喜事, 因為一隻查某嬰仔意外來出世!
"Goán kin-á-ji̍t boeh hun-hióng chi̍t-ê khó-ài ê tōa kiaⁿ-hí! Goán ê tōa-seng-seng ka-têng ū hí-sū, in-ūi chi̍t-chiah cha-bó͘ eⁿ-á ì-gōa lâi chhut-sì!

"另外一个想袂到 ê 部份是: 阮盡職 ê 看護員最近發現, 這个風神 tak-tak ê 老母, 當初 hông 想講是公 ê, 實際上是母 ê. 這真正是一个大轉踅 ah!"

"Lēng-gōa chi̍t-ê siūⁿ-bē-kàu ê pō͘-hūn sī: goán chīn-chit ê khàn-hō͘-oân chòe-kīn hoat-hiān, chit-ê hong-sîn tak-tak ê lāu-bú, tong-chho͘ hông siūⁿ-kóng sī kang-ê, si̍t-chè-siōng sī bó-ê. Che chin-chiàⁿ sī chi̍t-ê tōa tńg-se̍h ah!"

https://people.com/shock-twist-at-columbus-zoo-as-male-gorilla-gives-birth-to-baby-girl-7564204