外國遊客到 China 總算會得像本地人 án-ne 免扎現金
Gōa-kok iû-kheh kàu China chóng-sǹg ē-tit chhiūⁿ pún-tē-lâng án-ne bián chah hiān-kim
Rita Liao, 2023-7-22, FinTech
好消息予到 China 旅遊 ê 人! 你總算會當享受幾年前 tō 聽講 ê, 免現金, 順利納數 ê 體驗, koh 毋免 chak-chō 在地朋友先付錢, 你才提現金予伊, he 伊 mā 無地好用.
Hó siau-sit hō͘ kàu China lí-iû ê lâng! Lí chóng-sǹg ē-tàng hiáng-siū kúi-nî chêng tō thiaⁿ-kóng ê, bián hiān-kim, sūn-lī la̍p-siàu ê thé-giām, koh m̄-bián chak-chō chāi-tē pêng-iú seng hù-chîⁿ, lí chiah the̍h hiān-kim hō͘ i, he i mā bô-tè hó iōng.
這禮拜, China 兩大主流行動付款系統, WeChat Pay 和 Alipay, 宣布, 外國用者今會當透過 link* kap in ê 外國信用卡 (包括 Visa, Mastercard, 和 Discover) tī China 店面納數. [* link = 網路連結]
Chit lé-pài, China nn̄g tōa chú-liû hêng-tōng hù-khóa hē-thóng, WeChat Pay hām Alipay, soan-pò, gōa-kok iōng-chiá taⁿ ē-tàng thàu-kòe link* kap in ê gōa-kok sìn-iōng-khah (pau-koat Visa, Mastercard, hām Discover) tī China tiàm-bīn la̍p-siàu. [* link = bāng-lō͘ liân-kiat]
過去, tī China 用 WeChat 和 Alipay 需要有本地銀行口座, 這造成短期遊客用 chiah-ê 納數方法真大 ê 障礙. 對蹛 tī China ê 人來講, 納數變 kah 真利便, m̄-koh 對外國遊客來講, 欲揣肯收現金 ê 所在煞真頭疼. 因為, ùi 都市到庄跤, 現金已經大面予這兩大付款系統取代, 雖罔政府一再警告, 店面袂使拒絕現金.
Kòe-khì, tī China iōng WeChat hām Alipay su-iàu ū pún-tē gîn-hâng kháu-chō, che chō-sêng té-kî iû-kheh iōng chiah-ê la̍p-siàu hong-hoat chin tōa ê chiòng-gāi. Tùi tòa tī China ê lâng lâi-kóng, la̍p-siàu piàn kah chin lī-piān, m̄-koh tùi gōa-kok iû-kheh lâi-kóng, boeh chhōe khéng siu hiān-kim ê só͘-chāi soah chin thâu-thiàⁿ. In-ūi, ùi to͘-chhī kàu chng-kha, hiān-kim í-keng tōa-bīn hō͘ chit nn̄g tōa hù-khoán hē-thóng chhú-tāi, sui-bóng chèng-hú it-chài kéng-kò, tiàm-bīn bē-sái kī-choa̍t hiān-kim.
https://techcrunch.com/2023/07/21/foreign-visitors-to-china-can-finally-go-cashless-like-locals/
No comments:
Post a Comment