China 得著世界一 ê methane 動力太空發射

China 得著世界一 ê methane 動力太空發射

China tit-tio̍h sè-kài-it ê methane tōng-le̍k thài-khong hoat-siā

By David Szondy, 2023-7-12, New Atlas

China 成功發射 kō͘ 液體 methane* hām 酸素做動力 ê 太空火箭, tī 新一輪 ê 太空競爭領先世界. Beijing 時間 2023-7-12, 9:00am 太空公司 LandSpace ê Suzaku-2 Yao 助推器 tī China ê Jiuquan 衛星發射中心成功升天. [* methane /me.thén/ mā 叫沼氣]

China sêng-kong hoat-siā kō͘ e̍k-thé methane hām sng-sò͘ chò tōng-le̍k ê thài-khong hóe-chìⁿ, tī sin chi̍t-lûn ê thài-khong kēng-cheng léng-sian sè-kài. Beijing sî-kan 2023-7-12, 9:00am thài-khong kong-si LandSpace ê Suzaku-2 Yao chō͘-thui-khì tī China ê Jiuquan Ūi-seng Hoat-siā Tiong-sim sêng-kong seng-thian. [* methane /me.thén/ mā kiò chiau-khì]

Suzaku-2 mā 號做 Zhuque-2 (ZQ-2), 有 4 粒 TQ-12 Magpie enjín, 動力是 methane kap 酸素 ê 混合品, 每粒產生 150,000 lb [68,039 kg] ê 推力, 有夠 kā 6 噸 ê 載重送入低地球軌道.

Suzaku-2 mā hō-chò Zhuque-2 (ZQ-2), ū 4-lia̍p TQ-12 Magpie enjín, tōng-le̍k sī methane kap sng-sò͘ ê hūn-ha̍p-phín, múi-lia̍p sán-seng 150,000 lb [68,039 kg] ê thui-la̍t, ū-kàu kā 6-tùn ê chài-tāng sàng-ji̍p kē tē-kiû kúi-tō.

這擺發射是綴 tī 2022-12-14 發射失敗 ê 後跤蹬, 其他公司 mā bat 試圖發射 methane 燃料火箭, 包括 2023-3-22 Relativity Space ê Terran 1, hām 2023-4-20 SpaceX ê Starship. 另外, Blue Origin mā tng-teh 開發軌道發射 ê 家己 ê methane enjín.

Chit-pái hoat-siā sī tòe tī 2022-12-14 hoat-siā sit-pāi ê āu-kha-teⁿ, kî-thaⁿ kong-si mā bat chhì-tô͘ hoat-siā methane jiân-liāu hóe-chìⁿ, pau-koat 2023-3-22 Relativity Space ê Terran 1, hām 2023-4-20 SpaceX ê Starship. Lēng-gōa, Blue Origin mā tng-teh khai-hoat kúi-tō hoat-siā ê ka-tī ê methane enjín.

Suzaku-2 ê 上天毋但是一項技術成就, mā 標誌人類進入深太空 ê 大進步, mā 標誌 China 欲 tī 無久 ê 未來成做太空大國 ê 雄心.

Suzaku-2 ê chiūⁿ-thiⁿ m̄-nā sī chi̍t-hāng ki-su̍t sêng-chiū, mā piau-chì jîn-lūi chìn-ji̍p chhim thài-khong ê tōa chìn-pō͘, mā piau-chì China boeh tī bô-kú ê bī-lâi chiâⁿ-chò thài-khong tōa-kok ê hiông-sim.

https://newatlas.com/space/china-claims-world-first-with-methane-powered-space-launch/