搬厝發現後尾鎖著 ê 保險箱, 內面有祕密!
Poaⁿ-chhù hoat-hiān āu-bóe só-tio̍h ê pó-hiám-siuⁿ, lāi-bīn ū pì-bi̍t!
By Ally Dillinger, 2023-7-21, Bismarck Daily
搬入老厝, 你著接受厝 ê 歷史, 損壞, 以及舊厝主留落來 ê 物件. 搬厝留落 ê 奇怪物件可能造成不便, 罕得有啥價值. Matthew hām Maria 搬新厝, 注意後尾樹跤有一塊生鉎鐵鉼.
Poaⁿ-ji̍p lāu-chhù, lí tio̍h chiap-siū chhù ê le̍k-sú, sún-hoāi, í-ki̍p kū chhù-chú lâu lo̍h-lâi ê mi̍h-kiāⁿ. Poaⁿ-chhù lâu-lo̍h ê kî-koài mi̍h-kiāⁿ khó-lêng chō-sêng put-piān, hán-tit ū siáⁿ kè-ta̍t. Matthew hām Maria poaⁿ sin-chhù, chù-ì āu-bóe chhiū-kha ū chi̍t-tè seⁿ-sian thih-phiáⁿ.
In 叫是 he 是電纜 a̍h 電氣箱仔 ê 一部份 tō 無 chhap 伊. M̄-koh, 等 in 行倚看, 才發現代誌毋是 án-ne. "我原本叫是 he 是電氣箱," Matthew kā CNN 所屬 ê WCBS 講. 動物食了電箱頂懸 ê 樹葉了後, 翁某懷疑 he 毋是電箱, 好奇心引 in 去探究.
In kiò-sī he sī tiān-lám a̍h tiān-khì siuⁿ-á ê chi̍t pō͘-hūn tō bô chhap i. M̄-koh, tán in kiâⁿ-óa khòaⁿ, chiah hoat-hiān tāi-chì m̄-sī án-ne. "Góa goân-pún kiò-sī he sī tiān-khì-siuⁿ," Mathtew kā CNN só͘ sio̍k ê WCBS kóng. Tōng-bu̍t chia̍h liáu tiān-siuⁿ téng-koân ê chhiū-hio̍h liáu-āu, ang-bó͘ hoâi-gî he m̄-sī tiān-siuⁿ, hòⁿ-kî-sim ín in khì thàm-kiù.
CNN 報導講, "鹿仔 kā 樹葉食了, he tō 真顯目 ah," Matthew án-ne 講. 行倚 kā 看真, in 發現 he 是一跤生鉎 ê 舊保險箱; in 發現內面有錢 hām 濟濟珠寶 kō͘ 塑膠袋仔貯著. "面額一百 ê 票仔, 珠寶, 璇石, 訂婚手只. 幾十跤手只, 金框玉. Kài 著驚!" Matthew 講. In ê 發現聽講達美金 50 萬, kap 財寶做伙有一張紙條, 頂面寫地址. He 是厝邊 ê 地址.
CNN pò-tō kóng, "Lo̍k-á kā chhiū-hio̍h chia̍h liáu, he tō chin hiáⁿ-ba̍k ah," Matthew án-ne kóng. Kiâⁿ-óa kā khòaⁿ chin, in hoat-hiān he sī chi̍t-kha seⁿ-sian ê kū pó-hiám-siuⁿ; in hoat-hiān lāi-bīn ū chîⁿ hām chē-chē chu-pó kō͘ sok-ka tē-á té-tio̍h. "Bīn-gia̍h chi̍t-pah ê phiò-á, chu-pó, soān-chio̍h, tēng-hun chhiú-chí. Kúi cha̍p-kha chhiú-chí, kim khong gio̍k. Kài tio̍h-kiaⁿ!" Matthew kóng. In ê hoat-hiān thiaⁿ-kóng ta̍t bí-kim 50-bān, kap châi-pó chò-hóe ū chi̍t-tiuⁿ chóa-tiâu, téng-bīn siá tē-chí. He sī chhù-piⁿ ê tē-chí.
"頭先, 我硞厝邊 ê 門, 問 in 敢 bat 著賊偷, in 講, bat," Matthew 解說講. 警局證實, 彼家伙 bat tī Kitok 生隔工著賊, 干焦偷一跤保險箱. "警察 kā 厝主講, he 揣袂轉來 ah-lah," Maria 講. Matthew 講, 聽講 in 揣著 in ê 保險箱, 厝邊煞規身 phi̍h-phi̍h chhoah. Chit 對忠厚 ê 翁某甚至無想著 kā 財寶留予家己. "這根本毋是問題," Maria 講. "好心自然有好報," Matthew koh 補一句.
"Thâu-seng, góa khok chhù-piⁿ ê mn̂g, mn̄g in kám bat tio̍h chha̍t-thau, in kóng, bat," Matthew kái-soeh kóng. Kéng-kio̍k chèng-si̍t, hit ke-hóe bat tī Kitok-seⁿ keh-kang tio̍h chha̍t, kan-ta thau chi̍t-kha pó-hiám siuⁿ. "Kéng-chhat kā chhù-chú kóng, he chhōe bē tńg-lâi ah-lah," Maria kóng. Matthew kóng, thiaⁿ kóng in chhōe-tio̍h in ê pó-hiám-siuⁿ, chhù-piⁿ soah kui-sin phi̍h-phi̍h chhoah. Chit tùi tiong-hō͘ ê ang-bó͘ sīm-chì bô siūⁿ-tio̍h kā châi-pó lâu hō͘ ka-tī. "Che kin-pún m̄-sī būn-tê," Maria kóng. "Hó-sim chū-jiân ū hó-pò," Matthew koh pó͘ chi̍t-kù.
No comments:
Post a Comment