Caltech* ê 新 "Morphobot" 是一个會行路, 駕駛, hām 飛行 ê 小型變形機器人 [* Caltech = California 理工學院]
-- 靈感來自生物 ê 這个機器人會當家己改變形狀來上好 tek 對應環境.
By Wes Davis, 2023-6-28, The Verge
Caltech* ê sin "Morphobot" sī chi̍t-ê ē kiâⁿ-lō͘, kà-sú, hām hui-hêng ê sió-hêng piàn-hêng ke-khì-lâng [* Caltech = California Lí-kang Ha̍k-īⁿ]
-- Lêng-kám lâi-chū seng-bu̍t ê chit-ê ke-khì-lâng ē-tàng ka-tī kái-piàn hêng-chōng lâi siōng-hó-tek tùi-èng khoân-kéng.
By Wes Davis, 2023-6-28, The Verge
.
Caltech 有一个新機器人, 大細 ná 遙控汽車, he 會使改變家己 ê 形狀來駕駛, 飛行, hām 行路, hó-thang 滿足 tong-sî ê 需要. Tī 新聞稿, in kā 這台簡稱 M4 ê 機器人 hām Transformer (變形金鋼) 比較, 事實 mā 差無 kài 濟. M4 ê全名是 "Multi-Modal Mobility Morphobot [多模式行動變形機器人] (he ná 像 ’90 年代無入選 ê 囡仔節目提議).
Caltech ū chi̍t-ê sin ke-khì-lâng, tōa-sè ná iâu-khòng khì-chhia, he ē-sái kái-piàn ka-tī ê hêng-chōng lâi kà-sú, hui-hêng, hām kiâⁿ-lō͘, hó-thang boán-chiok tong-sî ê su-iàu. Tī sin-bûn kó, in kā chit-tâi kán-chheng M4 ê ke-khì-lâng hām Transformer (Piàn-hêng Kim-kong) pí-kàu, sū-si̍t mā chha bô kài chē. M4 ê choân-miâ sī "Multi-Modal Mobility Morphobot [To bô͘-sek hêng-tōng piàn-hêng ke-khì-lâng] (he ná-chhiūⁿ ’90 nî-tāi bô ji̍p-soán ê gín-á chiat-bo̍k thê-gī).
.
這台機器人有電子零件, motor /mó.tà/, hām 一台小電腦予伊決定採取啥物形狀來行動. 製作團隊 kā M4 安裝大輪仔, 予 he 會當 tī 幾秒內攑起, 變成 ná 無人機 (drone) ê 旋翼, 然後起飛.
Chit-tâi ke-khì-lâng ū tiān-chú lêng-kiāⁿ, motor /mó.tà/, hām chi̍t-tâi sío tiān-náu hō͘ i koat-tēng chhái-chhú siáⁿ-mih hêng-chōng lâi hêng-tōng. Chè-chok thoân-tūi kā M4 an-chong tōa lián-á, hō͘ he ē-tàng tī kúi-bió lāi gia̍h-khí, piàn-sêng ná bû-jîn-ki (drone) ê soân-si̍t, jiân-āu khí-poe.
.
伊 mā 會當 kō͘ 旋翼來 peh 崎坡, kō͘ 後面兩輪 ùi 塗跤驅動 ǹg 前, che 描寫 tī 一篇論文, 發表 tī Nature Communications. 另外, 如果機器人需要經過一塊特別 kham-khia̍t ê 地面, a̍h 是需要對頭前有較好 ê 觀察, 伊 mā 會使 kō͘ 兩輪 ná 雙跤 án-ne 徛起來.
I mā ē-tàng kō͘ soân-si̍t lâi peh kiā-pho, kō͘ āu-bīn nn̄g-lián ùi thô͘-kha khu-tōng ǹg-chêng, che biô-siá tī chi̍t-phiⁿ lūn-bûn, hoat-piáu tī Nature Communications. Lēng-gōa, jû-kó ke-khì-lâng su-iàu keng-kòe chi̍t-tè te̍k-pia̍t kham-khia̍t ê tē-bīn, a̍h-sī su-iàu tùi thâu-chêng ū khah hó ê koan-chhat, i mā ē-sái kō͘ nn̄g-lián ná siang-kha án-ne khiā khí-lâi.
.
No comments:
Post a Comment