空氣品質 過濾器 意外收集 ê 空氣中 ê DNA 顯示出 物種 ê 狀況 -- 新研究 顯示, 檢測汙染 ê 監測站 mā 會使 記錄 生物多樣性 ê 下降.
Khong-khì phín-chit kòe-lī-khì ì-gōa siu-chi̍p ê khong-khì tiong ê DNA hián-sī chhut bu̍t-chióng ê chōng-hóng -- Sin gián-kiù hián-sī, kiám-chhek u-jiám ê kàm-chhek-chām mā ē-sái kì-lo̍k seng-bu̍t to-iūⁿ-sèng ê hā-kàng.
根據一篇 新 ê 科學論文, ùi 貓頭鳥 kàu 刺豬 koh kàu 菌類, 來自 植物 hām 動物 ê 遺傳 物質 hō͘ 世界 各地 ê 空氣品質 監測站 無意中記錄 落來, 成做一个 猶未開發 ê "生物 多樣性 ê 資料庫."
Kin-kì chi̍t-phiⁿ sin ê kho-ha̍k lūn-bûn, ùi niau-thâu-chiáu kàu chhì-ti koh kàu khún-lūi, lâi-chū si̍t-bu̍t hām tōng-bu̍t ê ûi-thoân bu̍t-chit hō͘ sè-kài kok-tē ê khong-khì phín-chit kàm-chhek-chām bô-ì-tiong kì-lo̍k lo̍h-lâi, chiâⁿ-chò chi̍t-ê iáu-bōe khai-hoat ê "seng-bu̍t to-iūⁿ-sèng ê chu-liāu-khò͘."
全球 te̍k, 千千萬萬 ê 空氣 過濾器 無停 teh 檢驗 大氣內面 ê 重金屬 hām 其他 汙染物. 科學家 今 mā 發覺, 這个 監測網 mā ùi 毛髮, 羽毛, 喙瀾, hām 花粉 ê 屑仔 中間 收集 tio̍h 看袂著 ê 遺傳物質 痕跡, 也 tō 是 空氣中 ê 環境 DNA (eDNA).
Choân-kiû te̍k, chheng-chheng bān-bān ê khong-khì kòe-lī-khì bô-thêng teh kiám-giām tāi-khì lāi-bīn ê tāng kim-sio̍k hām kî-thaⁿ u-jiám-mi̍h. Kho-ha̍k ka taⁿ mā hoat-kak, chit-ê kàm-chhek bāng mā ùi mo͘-hoat, ú-mo͘, chhùi-nōa, hām hoe-hún ê sap-á tiong-kan siu-chi̍p tio̍h khòaⁿ-bē-tio̍h ê ûi-thoân bu̍t-chit hûn-jiah, iā tō-sī khong-khì tiong ê khoân-kéng DNA (eDNA).
Ùi 英國兩个 空氣品質站 (一个 tī London 公園, 另个 tī Edinburgh 郊外) 檢驗 ê eDNA 顯示出 超過 180 種 ê 菌類, 蟲豸, 哺乳類, 鳥類, hām 兩棲類, 包括 iû-chhí (鼬鼠), 睏鼠, 小貓頭鳥, 刺豬 hām êng-goân (蠑螈). Mā收集有 植物 ê eDNA, 包括 si-chháu (蓍草), 雛菊, 咬人貓, 麥仔, 大豆 hām 包心菜.
Ùi Eng-kok nn̄g-ê khong-khì phín-chit chām (chi̍t-ê tī London kong-hn̂g, lēng-ê tī Edinburgh kau-gōa) kiám-giām ê eDNA hián-sī chhut chhiau-kòe 180 chióng ê khùn-lūi, thâng-thōa, pō͘-jú-lūi, chiáu-lūi, hām lióng-chhe-lūi, pau-koat iû-chhí (鼬鼠), khùn-chhí, sió niau-thâu-chiáu, chhì-ti hām êng-goân (蠑螈). Mā siu-chi̍p ū si̍t-bu̍t ê eDNA, pau-koat si-chháu (蓍草), chhu-kiok, kā-lâng-niau, be̍h-á, tōa-tāu hām pau-sim-chhài.
--
No comments:
Post a Comment