2018-3-14:3 (2018 nî 3 goe̍h 14, pài 3)
Stephen Hawking, 76 hòe, kòe-sin ah. I sī kho-ha̍k-kài ê thiⁿ-téng siōng bêng-liāng ê hit-lia̍p chheⁿ; i ê gán-kong chí-ín tio̍h hiān-tāi ê ú-tiū-ha̍k, pēng-chhiáⁿ kó͘-bú choân sè-kài kúi-nā pah-bān lâng. In chhù ê lâng tī Pài-saⁿ chá-khí hoat seng-bêng khak-jīn i tī Cambridge in tau sí-bông. Hawking ê gín-á Lucy, Robert, kap Tim tī seng-bêng nih kóng, "Goán só͘-ài ê lāu-pē kin-á-ji̍t kòe-sin, goán lóng chin pi-siong."
Stephen Hawking, 76 歲, 過身 ah. 伊是科學界 ê 天頂上明亮 ê 彼粒星; 伊 ê 眼光指引 tio̍h 現代 ê 宇宙學, 並且鼓舞全世界幾若百萬人. In 厝 ê 人 tī 拜三早起發聲明確認伊 tī Cambridge in 兜死亡. Hawking ê 囡仔 Lucy, Robert, kap Tim tī 聲明 nih 講, "阮所愛 ê 老爸今仔日過身, 阮攏真悲傷."
"I sī úi-tāi ê kho-ha̍k-ka, mā sī liáu-put-khí ê lâng, i ê gián-kiù kap sêng-chiū ē kè-sio̍k thoân lo̍h-khì. I ê ióng-khì kap kian-chhî, chham tio̍h i ê chhong-bêng kap hó-chhiò-khoe lóng teh kó͘-bú sè-kài siōng ê lâng. I bat kóng-kòe: 'Nā bô lí ài ê lâng tī lāi-té, ú-tiū iáu ū siáⁿ ì-sù.' Goán lóng ē éng-oán hoâi-liām i." Tùi kho-ha̍k-kài kap i ê chhin-lâng lâi kóng, Hawking ê gán-kong kap hó-chhiò-khoe tō ná chhin-chhiūⁿ i put-choân ê sin-khu kap i iōng ha̍p-sêng ê siaⁿ-im kāng-khoán, phiau-chì tio̍h lán lâng sim-chì ê bô-khó hān-liōng.
"伊是偉大 ê 科學家, mā 是了不起 ê 人, 伊 ê 研究 kap 成就會繼續傳落去. 伊 ê 勇氣 kap 堅持, 參 tio̍h 伊 ê 聰明 kap 好笑詼 lóng teh 鼓舞世界上 ê 人. 伊 bat 講過: '若無你愛 ê 人 tī 內底, 宇宙猶有啥意思.' 阮攏會永遠懷念伊." Tùi 科學界 kap 伊 ê 親人來講, Hawking ê 眼光 kap 好笑詼 tō 那親像伊不全 ê 身軀 kap 伊用合成 ê 聲音仝款, 標誌 tio̍h 咱人心志 ê 無可限量.
No comments:
Post a Comment