Chin-lâng kò͘-sū: Ài ê le̍k-liōng / 真人故事: 愛的力量
Tē-it-pái tī tiān-sī khòaⁿ-tio̍h Ò-chiu kí-tāng soán-chhiú Matthias Steiner ê sî, Susann tō chiok him-sióng i. I koat-tēng boeh bat chit-ê lâng, tō khì mn̄g tiān-sī-tâi ê lâng, án-chóaⁿ ē-tàng kah i liân-lo̍k, it-ti̍t-kàu in thàu-lāu i-ê tē-chí. Chū-án-ne, i sûi siá-phe hō͘ Matthias, nn̄g-lâng kìⁿ-bīn sio-bat, it-kiàn-chiong-chêng, bô gōa-kú tō kiat-hun ah.
第一擺 tī 電視看著澳洲舉重選手 Matthias Steiner ê 時, Susann tō 足欣賞伊. 伊決定 boeh bat 這个人, tō 去問電視台 ê 人, 按怎 ē-tàng kah 伊連絡, 一直到 in 透漏伊 ê 地址. 自 án-ne, 伊隨寫批予 Steiner, 兩人見面相 bat, 一見鍾情, 無偌久 tō 結婚 ah.
--
Steiner ūi-tio̍h in bó͘, î-bîn khì Tek-kok, chiâⁿ-chò Tek-kok ê kí-tāng soán-chhiú, jî-chhiáⁿ tah-èng in bó͘, kóng boeh iâⁿ chi̍t-tè Olympik ê chióng-pâi hō͘ i. Put-heng, tī 2007-nî, i-ê súi-bó͘ Susann in-ūi chhia-hō soah lâi sí. I siū-tio̍h chiok tōa ê táⁿ-kek, m̄-koh pēng bô bē-kì-tit i tah-èng in bó͘ ê tāi-chì. Keng-kòe chióng-chióng ê khùn-lân, chòe-āu i tāi-piáu Tek-kok chham-ka 2008-nî tī Pak-kiaⁿ Olympik ê kí-tāng pí-sài.
Steiner 為著 in 某, 移民去德國, 成做德國 ê 舉重選手, 而且答應 in 某, 講 boeh 贏一塊 Olympik ê 獎牌予伊. 不幸, tī 2007 年, 伊 ê súi 某 Susann 因為車禍 soah 來死. 伊受著足大 ê 打擊, m̄-koh 並無袂記得伊答應 in 某 ê 代誌. 經過種種 ê 困難, 伊最後代表德國參加 2008 年 tī 北京 Olympik ê 舉重比賽.
--
Chit-ê pí-sài lāi-té, Steiner tú--tio̍h ê lóng sī ko-chhiú. Pí-sài ê sî, i ē-sái giâ 3-pái, tān-sī chêng 2-pái i lóng sit-pāi. Hiān-khòaⁿ tō-boeh bô ki-hōe khiā-chiūⁿ niá-chióng-tâi ah, i chiong só͘-ū ê khùi-la̍t kah hi-bōng lóng tó͘ tī tē-3-pái, mā-sī siōng bóe-pái ê ki-hōe. Chin hó-ka-chài, tē-3-pái i sêng-kong lah, iâⁿ-tio̍h chi̍t-tè kim-pâi. I tit-chióng ê ōe-bīn choân sè-kài ū kúi-nā pah-bān lâng teh khòaⁿ, Steiner ka-tī mā kám-tōng kah ná lâu ba̍k-sái ná the̍h in bó͘ ê siòng-phìⁿ hō͘ tak-ke khòaⁿ.
這个比賽內底, Steiner tú 著 ê lóng 是高手. 比賽 ê 時, 伊 ē-sái 夯 3 擺, 但是前 2 擺伊 lóng 失敗. 現看 tō-boeh 無機會 khiā 上領獎台 ah, 伊將所有 ê 氣力 kah 希望 lóng 賭 tī 第 3 擺, mā 是上尾擺 ê 機會. 真好佳哉, 第 3 擺伊成功 lah, 贏著一塊金牌. 伊得獎 ê 畫面全世界有幾若百萬人 teh 看, Steiner ka-tī mā 感動 kah ná 流目屎 ná 提 in 某 ê 相片予大家看.
--
No comments:
Post a Comment